চিটাৰা ডেস্ক, 16 অক্টোবৰ: চেক বাউন্স আৰু জালিয়াতিৰ গোচৰত নিজৰ বক্তব্য লিপিবদ্ধ কৰিবলৈ ৰাঁচীত উপস্থিত নহ’ল অভিনেত্ৰী অমিষা পেটেল । সোমবাৰে ৰাঁচী দেৱানী আদালতত হাজিৰ হোৱাৰ কথা আছিল অভিনেত্ৰীগৰাকীৰ ৷ কিন্তু সোমবাৰে অমিষা পেটেলৰ ঠাইত তেওঁৰ অধিবক্তা এই গোচৰত ন্যায়াধীশ ডি এন শুক্লাৰ আদালতত হাজিৰ হয় । অভিনেত্ৰীগৰাকীৰ অধিবক্তাই আদালতৰ পৰা কিছু সময় দিবলৈ আহ্বান জনায় । ইয়াৰ উপৰিও তেওঁৰ দ্বাৰা ৩১১ নং ধাৰাত আবেদনো দাখিল কৰা হয় । ৩১১ নং ধাৰাত অমিষা পেটেলৰ অধিবক্তাই পুনৰবাৰ অভিযোগকাৰীক আদালতত সাক্ষ্য দিবলৈ দাবী জনায় । কিন্তু ইয়াৰ বিৰোধিতা কৰে অভিযোগকাৰীৰ অধিবক্তাই ।
উল্লেখ্য যে অমিষা পেটেলে ইতিমধ্যে দুবাৰকৈ সময় বিচাৰিছে । ইয়াৰ বাবে ন্যায়াধীশ ডি এন শুক্লাৰ আদালতেও অভিনেত্ৰী অমিষা পেটেলৰ বিৰুদ্ধে ৫০০ টকা জৰিমনা বিহিছিল । অভিযোগকাৰী অজয় কুমাৰ সিঙে দেৱানী আদালতত গোচৰ ৰুজু কৰাৰ পিচতে অমিষা পেটেলৰ বিৰুদ্ধে জাৰি কৰা হৈছিল ৱাৰেণ্ট । ইয়াৰ পিচত জুন মাহত শাৰীৰিকভাৱে আদালতত হাজিৰ হৈছিল অমিষা পেটেল । কিন্তু তেতিয়াৰে পৰাই অভিনেত্ৰীগৰাকীয়ে আদালতৰ পৰা অধিক সময় বিচাৰিছে ।
বাৰে বাৰে সময় বিচৰাটো ঠিক নহয় – অধিবক্তা
যোৱা শুনানিৰ সময়ত অভিযোগকাৰী অজয় কুমাৰ সিঙৰ বক্তব্য লিপিবদ্ধ কৰা হৈছিল । ইয়াৰ পিচত অমিষা পেটেলে ১৬ অক্টোবৰত নিজৰ বক্তব্য লিপিবদ্ধ কৰাৰ কথা আছিল । কিন্তু আদালতত হাজিৰ নহ’ল অমিষা পেটেল । বৰঞ্চ অভিনেত্ৰীগৰাকীৰ ফালৰ পৰা আদালতৰ পৰা বাৰে বাৰে সময় হে বিচাৰি থকা হৈছে ৷ অভিযোগকাৰী অজয় কুমাৰ সিঙৰ অধিবক্তা বিজয়া লক্ষ্মীয়ে কয় যে যিদৰে অহৰহ সময় বিচৰা হৈছে সেয়া সঠিক নহয় । এনে পৰিস্থিতিত আইনৰ দ্বাৰা কঠোৰ ব্যৱস্থা গ্ৰহণ কৰিব লাগে যাতে অভিনেত্ৰী অমিষা পেটেলৰ হৈ বক্তব্য লিপিবদ্ধ কৰিবলৈ বাৰে বাৰে সময় বিচৰাৰ প্ৰক্ৰিয়া বন্ধ হৈ যায় । তেওঁ কয় যে পৰৱৰ্তী তাৰিখ পোৱাৰ পিচতহে সিদ্ধান্ত লোৱা হ’ব যে কেতিয়া অমিষা পেটেল সাক্ষ্যৰ বাবে আহিব ।
সমগ্ৰ ঘটনাটো কি আছিল ?
উল্লেখ্য যে, অভিনেত্ৰী অমিষা পেটেলে দেশী মেজিক ছবি নিৰ্মাণৰ বাবে ৰাঁচীৰ ছবি প্ৰযোজক অজয় কুমাৰ সিঙৰ পৰা ২.৫ কোটি টকা লৈছিল আৰু ছবিখন মুক্তি পোৱাৰ পিচত তেওঁৰ ধন লাভৰ সৈতে ঘূৰাই দিয়া হ’ব বুলি আশ্বাস দিছিল । কিন্তু বহু সময়ৰ পাচতো অজয় কুমাৰ সিঙে নিজৰ ধন উভতাই নাপালে । সেয়েহে, তেওঁ আইনৰ আশ্ৰয় লয় । অজয় কুমাৰ সিঙে অভিযোগ কৰে যে অমিষা পেটেলৰ পৰা ধন বিচৰাৰ সময়ত তেওঁক ভাবুকি দিয়া হয় আৰু টকা উভতাই দিয়া নহ’ব বুলিও কোৱা হয় ৷ অজয় কুমাৰ সিঙে অমিষা পেটেলৰ বিৰুদ্ধে চেক বাউন্সৰো অভিযোগ উত্থাপন কৰিছে ।
