ডিমা হাছাও, 27 আগষ্ট : ডিমা হাছাও জিলাত বৃহস্পতিবাৰে নিশা হোৱা উগ্ৰপন্থীৰ আক্ৰমণত নিহত হৈছে কেইবা গৰাকীও ট্ৰাক চালক ৷ ৰাজ্য তথা দেশজুৰি চাঞ্চল্যৰ সৃষ্টি হোৱা এই ঘটনাত উত্তৰ প্ৰদেশৰ এগৰাকী ট্ৰাক চালকো নিহত হোৱাৰ খবৰ পোৱা গৈছে । বৃহস্পতিবাৰ দিয়ুংমুখ আৰক্ষী থানাৰ অন্তৰ্গত ৰেঞ্জাৰবিল অঞ্চলত সন্দেহযুক্ত ডিমাচা নেচনেল লিবাৰেচন আৰ্মি চমুকৈ ডিএনএলএ উগ্ৰপন্থী সংগঠনৰ ভয়ংকৰ আক্ৰমণত থিতাতে নিহত হৈছিল পাঁচ গৰাকী ট্ৰাক চালক ।
এই আক্ৰমণত গুলিবিদ্ধ হৈ আহত হয় ফাৰুক আহমেদ নামৰ আৰু এগৰাকী ট্ৰাক চালক। বৰ্তমানে আহত ট্ৰাক চালক জনৰ নগাঁৱৰ ভোগেশ্বৰী ফুকননী অসামৰিক চিকিৎসালয়ত চিকিৎসা চলি আছে । নিহত পাঁচ গৰাকী ট্ৰাক চালকৰ মাজতে ধৰ্মেন্দ্ৰ কুমাৰ পাৰচৰ ঘৰ হৈছে উত্তৰ প্ৰদেশত আৰু বাকী চাৰি গৰাকী ট্ৰাক চালক হৈছে হোজাই জিলাৰ লংকাৰ বাসিন্দা । এই ট্ৰাক চালক কেইজন হ‘ল ক্ৰমে গৌড় মজুমদাৰ, দিলওয়াৰ হুছেইন, সিকন্দৰ আলি আৰু অজগৰ আলি ।
বৃহস্পতিবাৰে, উমৰাংচুৰ ডালমিয়া চিমেণ্টৰ পৰা কয়লা লৈ লংকালৈ যোৱাৰ পথত ডিমা হাছাও জিলাৰ দিয়ুংমুখ আৰক্ষী থানাৰ অন্তৰ্গত ৰেঞ্জাৰবিল অঞ্চলত ট্ৰাক চালক সকলৰ ওপৰত আক্ৰমণ চলায় সন্দেহযুক্ত ডিএনএলএ উগ্ৰপন্থীয়ে । পাঁচখন ট্ৰাকক লক্ষ্য কৰি আঠ-দহ জনীয়া এটা উগ্ৰপন্থী দলে গুলী বর্ষণ কৰাৰ ফলত পাঁচ গৰাকী ট্ৰাক চালক থিতাতে নিহত হয় ৷ ইয়াৰ পিছতে 5 খন ট্ৰাকত পেট্ৰল ঢালি জুই লগাই দিয়ে উগ্ৰপন্থীৰ দলটোৱে ।
ডিমা হাছাও জিলাৰ আৰক্ষী অধীক্ষক জয়ন্ত সিঙে জানিবলৈ দিয়ে যে, এই ঘটনাৰ লগতে ডিএনএলএ উগ্ৰপন্থী জড়িত থাকিব পাৰে । যোৱা ডেৰ বছৰ আগতে ডালমিয়া চিমেণ্টক ধন দাবী কৰিছিল উগ্ৰপন্থী সংগঠনটোৱে আৰু দাবী মতে ধন আদায় নিদিয়াৰ বাবে উগ্ৰপন্থী সংগঠটোৱে এই আক্ৰমণৰ ঘটনা সংগঠিত কৰিছে বুলি সন্দেহ কৰিছে আৰক্ষীয়ে ৷ তেওঁ কয় এই ভয়ংকৰ ঘটনাৰ পিচতে আৰক্ষী আৰু নিৰাপত্তা বাহিনীয়ে উগ্ৰপন্থী সংগঠনটোৰ বিৰুদ্ধে অভিযান তীব্ৰতৰ কৰি তুলিছে ।
লগতে পঢ়ক : প্ৰথমে ধৰ্ষণ, তাৰ পিছত চোকা অস্ত্ৰৰে ডিঙি ৰেপি হত্যা কিশোৰীক
