তিনিচুকীয়া, 19 আগষ্ট: তিনিচুকীয়াৰ বৰদলৈ নগৰৰ পৰা এজন যুৱক সন্ধানহীন হৈ আছে(Youth From Tinsukia Goes Missing) ৷ সন্ধানহীন যুৱকজন দৰ্পণ জ্যোতি বৰ্মন(23) বুলি জানিব পৰা হৈছে ৷ বৃহস্পতিবাৰে এজন বন্ধুক সাক্ষাৎ কৰাৰ পাছৰে পৰা সন্ধানহীন হৈ আছে যুৱকজন । যুৱকজনৰ সন্ধানহীন হোৱাক লৈ পৰিয়ালবৰ্গৰ মাজত বিৰাজ কৰিছে এক শোকাকুল পৰিৱেশে ।
সন্ধানহীন যুৱকজনে বৃহস্পতিবাৰে ঘৰৰ পৰা বন্ধু এজনৰ দোকানলৈ আহি অলপ সময় মত বিনিময় কৰিছিল । তেওঁৰ বন্ধুজনে সংবাদ মাধ্যমৰ আগত প্ৰকাশ কৰা অনুসৰি গুইজানলৈ যোৱাৰ কথা অৱগত কৰিছিল দৰ্পণ জ্যোতি বৰ্মনে । ইয়াৰ পিছতে আজি অৰ্থাৎ শুকুৰবাৰে স্থানীয় ৰাইজ আৰু পৰিয়ালৰ লোকে গুইজানলৈ আহি গুইজান আৰক্ষী থানাত এজাহাৰ দাখিল কৰে ।
আনহাতে এছডিআৰএফৰ এটা দলেও পুৱাৰে পৰা ডিব্ৰু-ডাঙৰী নদীত উদ্ধাৰ অভিযান চলায় আছে যদিও বৰ্তমানলৈ যুৱকজনৰ কোনো সম্ভেদ লাভ কৰিবলৈ সক্ষম হোৱা নাই ৷ যুৱকজনে চলাই অহা চাইকেলখনো গুইজান ঘাটত তলা মাৰি থোৱা অৱস্থাত উদ্ধাৰ কৰা হৈছে ৷ সন্ধানহীন যুৱকজনৰ কোনো লোকে সন্ধান লাভ কৰিলে অৱগত কৰিবলৈ যুৱকজনৰ মাতৃৰ লগতে পৰিয়ালবৰ্গই আহ্বান জনাইছে ।
