ডুমডুমা, 13 জুলাইঃ তিনিচুকীয়া জিলাৰ তৰাণী গাঁৱৰ লোকসকলে পথত ভূঁই ৰুই,মাছ ধৰি অভিনৱ প্ৰতিবাদ সাব্যস্ত কৰে ৰাইজে ৷ বছৰ বছৰ ধৰি ৩নং তৰাণীৰ পৰা বালিজান সংযোগী পথটোৰ বাবে জলা-কলা খাই আহিব লগীয়া হোৱাত ক্ষুব্ধ হৈ পৰে স্থানীয় লোকসকল ৷
স্বাধীনতাৰ ৭ টা দশক পাৰ হোৱাৰ পিছতো তিনিচুকীয়া জিলাৰ ৩নং তৰাণীৰ পৰা বালিজান সংযোগী পথটো এতিয়া জৰাজীৰ্ণ অৱস্থা হৈ আছে ৷ বছৰ বছৰ ধৰি এই পথচোৱাত যাতায়াতৰ বাবে জলাকলা খাই আহিবলগীয়া হৈ আহিছে ৰাইজে ৷ তাৰোপৰি বাৰিষা অহাৰ লগে লগে পথটো পানীত ডুব গৈ থকাৰ ফলত স্কুলীয়া ছাত্ৰ-ছাত্ৰীৰ লগতে পথাচাৰী সকলৰ যাতায়াতৰ বাবে এতিয়া হাহাকাৰ পৰিস্থিতিৰ সৃষ্টি হৈছে ৰাইজৰ ৷ ইফালে সুদীৰ্ঘ কাল কংগ্ৰেছৰ শাসনত আছিল যদিও উক্ত পথটো মেৰামতিৰ বাবে কোনো গুৰুত্ব নিদিয়াৰ অভিযোগ কৰে ৷ ইতিমধ্যে উক্ত পথটোৰে গাড়ী মটৰ চলাটো দুৰৰে কথা খোজকাঢ়ি যাবলৈ এতিয়া উপয়ুক্ত নহয় পথটো ৷
তাৰোপৰি,এই লোকসকলে পৰিৱৰ্তনৰ আশাত ২০১৬ চনৰ বিধানসভা নিৰ্বাচনত বিজেপি দলৰ বিধায়ক ভাস্কৰ শৰ্মাক নিৰ্বাচিত কৰিছিল যদিও তৰাণী গাঁৱৰ ৰাইজৰ সমস্যা সমস্যা হৈয়েই ৰ'ল । আনকি এজাক বৰষুণতেই একাঠু একাঠু বোকাৰ সৃষ্টি হোৱাত হাহাকাৰ পৰিস্থিতিৰ সৃষ্টি হয় ৷ বৰ্তমান চৰকাৰ খনে উন্নয়নৰ নামত ঢাক-ঢোল বজাই বিভিন্ন সভাই সমিতিয়ে মন্তব্য কৰি আহিছে যদিও এই দৃশ্যই উদঙাইছে চৰকাৰ খনৰ প্ৰকৃত ছবি বুলি ক্ষোভ প্ৰকাশ কৰে ৷ আগন্তুক নিৰ্বাচনত ইয়াৰ প্ৰত্যুত্তৰ দিয়া হ'ব বুলি সকীয়াই দিয়ে প্ৰতিবাদকাৰী সকলে ৷ তাৰেপৰি চৰকাৰ খনৰ বিৰুদ্ধে বিভিন্ন শ্ল'গান দি পৰিৱেশ উত্তাল কৰি তোলাৰ লগতে উক্ত ঘটনাত ক্ষুব্ধ হৈ এনেদৰেই বোকাময় পথৰ ওপৰতেই ভূঁই ৰুই,মাছ ধৰি প্ৰতিবাদ কৰিবলৈ বাধ্য হৈছে স্থানীয় লোকসকলে ।
তাৰোপৰি পথচোৱাৰ কেইবাটাও অংশত কালভাৰ্ট ভাঙি যোৱাৰ ফলত স্থানীয় লোকসকলে বাঁহৰ সাকোৰে ভয়ংকৰ ভাৱে অহা-যোৱা কৰিবলগীয়া হৈছে । পথটোৰ এই ভয়ংকৰ অৱস্থা হোৱাৰ বাবে অঞ্চলটোৰ সকলো পুৰুষ-মহিলা ওলাই আহি পথৰ ওপৰত স্থানীয় জনপ্ৰতিনিধিৰ লগতে চৰকাৰৰ বিৰুদ্ধে তীব্ৰ প্ৰতিবাদ সাব্যস্ত কৰে ৷ অতি শীঘ্ৰে উক্ত পথটো মেৰামতি কৰি দি যাতায়াতৰ বাবে সু ব্যৱস্থা কৰি দিবলৈ চৰকাৰক আহ্বান জনাইছে স্থানীয় লোক সকলে ।
লগতে পঢ়ক- প্ৰলয়ংকাৰী বানত প্লাৱিত ৰঙিয়াৰ শতাধিক গাওঁ
