তেজপুৰ, ১১ নৱেম্বৰ : বিবাহ অভ্যৰ্থনা অনুষ্ঠানত নৱ বিবাহিত দম্পতীয়ে হাতত অত্যাধুনিক মাৰণাস্ত্ৰ লৈ ৰাজহুৱাভাৱে প'জ দিয়াৰ ভিডিঅ' চ'ছিয়েল মিডিয়াত ভাইৰেল হৈ পৰিছে ৷ নাগালেণ্ডৰ ডিমাপুৰত সংঘটিত এই ঘটনাৰ পাচতে সচেতন মহলৰ মাজত প্ৰতিক্ৰিয়াৰ সৃষ্টি হৈছে ৷
নগা উগ্ৰপন্থী সংগঠন NSCN-United ৰ গৃহমন্ত্ৰী কিল' কিল'চনাৰ পুত্ৰ বহ'ট কিবাৰ বিবাহৰ অভ্যৰ্থনা অনুষ্ঠানত নৱ বিবাহিত দম্পতীয়ে এই কাণ্ড সংঘটিত কৰে ৷ শনিবাৰে ডিমাপুৰৰ ৫ মাইলত বিবাহৰ অভ্যৰ্থনা অনুষ্ঠানত বহ'ট কিবা আৰু তেওঁৰ পত্নীয়ে মাৰণাস্ত্ৰ প্ৰদৰ্শন কৰাত হতচকিত হৈ পৰে উপস্থিত ৰাইজ ৷
উল্লেখযোগ্য যে, যি সময়ত নগা উগ্ৰপন্থী আৰু কেন্দ্ৰীয় চৰকাৰৰ মাজত শান্তি বাৰ্তালাপ সমাধানৰ দিশত আগবাঢ়িছে সেই সময়তে এনে কাণ্ড সংঘটিত হোৱাত সকলোৱে আশ্চৰ্য প্ৰকাশ কৰিছে ৷ ইতিমধ্যেই সমগ্ৰ ঘটনাৰ ফ'টো চ'ছিয়েল মিডিয়াত ভাইৰেল হৈ পৰিছে ৷
