তেজপুৰ, 16 অক্টোবৰঃ জি এম চি এইচত মৃত্যু ঘটিল তেজপুৰ ডিটেনশ্যন কেম্পৰ দুলাল চন্দ্ৰ পাল নামৰ লোক এজনৰ । ৫ দিন উকলি যোৱাৰ পাছতো মৃতদেহ চমজি ল'বলৈ পৰিয়ালৰ লোকে অস্বীকাৰ কৰিছে । চিকিৎসালয়ৰ মৰ্গতে ৫ দিন ধৰি পৰি আছে দুলাল চন্দ্ৰ পালৰ মৃতদেহটো ।
উল্লেখযোগ্য যে, ২০১৭ চনৰ ১১ অক্টোবৰ তাৰিখে এফ টি ( এ ) গোচৰ নং ২২৩/২০১৭ ৰ অধীনত ঢেকীয়াজুলি আলিচিঙাৰ দুলাল চন্দ্ৰ পালক বিদেশী নাগৰিক বুলি ঘোষণা কৰি তেজপুৰ ডিটেনশ্যন কেম্পত ভৰ্তি কৰোৱা হৈছিল । দীৰ্ঘদিন ধৰি মধুমেহ ৰোগত আক্ৰান্ত হৈ আছিল দুলাল চন্দ্ৰ পাল । ২৮ ছেপ্টেম্বৰত জি এম চি এইচত তেখেতক ভৰ্তি কৰোৱাৰ পাছত চিকিৎসাধীন অৱস্থাতে ১১ অক্টোবৰত লোকজনৰ মৃত্যু হয় । বৰ্তমান মৃতদেহটো চমজি লবলৈ অস্বীকাৰ কৰিছে মৃত দুলাল চন্দ্ৰ পালৰ পৰিয়ালৰ লোকে। পৰিয়ালৰ লোকে মৃত পালক ভাৰতীয় বুলি ঘোষণা কৰক নহয় তেখেতৰ মৃতদেহ বাংলাদেশলৈ পঠিয়াই দিয়ক বুলি প্ৰশাসনক দাবী জনাইছে ।
