তেজপুৰ, 23 মাৰ্চ : শোণিতপুৰ জিলা প্ৰশাসনে কৰ'ণা ভাইৰাছৰ ৰোগীৰ চিকিৎসাৰ বাবে আগতীয়াকৈ প্ৰয়োজনীয় ব্যৱস্থা গ্ৰহণ কৰিছে । জিলা প্ৰশাসনে ইতিমধ্যে চহৰখনৰ প্ৰায় 40 খনৰো অধিক হোটেল, হোষ্টেল, আবাসিক গৃহ প্ৰশাসনৰ অধীনত আনিছে । পৰবৰ্তী সময়ত সম্ভাব্য ৰোগীৰ চিকিৎসাৰ বাবে এইসমূহ ব্যৱহাৰ কৰা হ'ব বুলি জানিবলৈ দিছে জিলা উপায়ুক্তই ।
যিকোনো মুহূৰ্ততে ৰোগীৰ তাৎক্ষণিক চিকিৎসা প্ৰদান কৰিবৰ বাবে ইতিমধ্যে কেইখনমান ব্যক্তিগত চিকিৎসালয়ো প্ৰায় খালি কৰি ৰখা হৈছে । আনহাতে স্বাস্থ্যমন্ত্ৰী ডঃ হিমন্ত বিশ্ব শৰ্মাই আজি তেজপুৰ মেডিকেল কলেজ হাস্পাতাল পৰিদৰ্শন কৰি আছুতীয়া কোঠাসমূহৰ লগতে পৰ্য্যাপ্ত পৰিমাণে আইচিইউৰ বাবেও সাজু হৈ থাকিবলৈ আহ্বান জনায় । লগতে দুই এদিনৰ ভিতৰতে তেজপুৰ মেডিকেল কলেজৰ হাস্পতালত COVID-19ৰ পৰীক্ষাগাৰ ব্যৱস্থা হোৱাৰ কথাও প্ৰকাশ কৰে স্বাস্থ্যমন্ত্ৰীগৰাকীয়ে ।
