তেজপুৰ, 2 নৱেম্বৰ : তেজপুৰৰ ৰঙাপৰা সমষ্টিৰ বিধায়ক ৰাজেন বৰঠাকুৰৰ ঘনিষ্ঠ তথা সোঁহাতস্বৰূপ জিতেন দাসৰ গুণ্ডা বাহিনীৰ আক্ৰমণৰ বলি হ'ল যুৱতীসহ তিনিজন ৷ ঘটনাৰ বিৱৰণী অনুসৰি,মাজগাঁৱৰ জ্যোতিনগৰ নিবাসী পংকজ নাথ,ভগ্নী মধুস্মিতা নাথ আৰু মাতৃ বুবুল নাথ বৃহস্পতিবাৰে নিশা আলহীৰ ঘৰৰ পৰা উভতি আহোতে বিজেপিৰ ছত্ৰ ছায়াত থকা তিনি উদণ্ড যুৱকে হকী ষ্টিকেৰে আক্ৰমণ কৰে ৷ আক্ৰমণৰ ফলত বৰ্তমান পৰিয়ালৰ তিনিগৰাকী লোক তেজপুৰ কনকলতা অসামৰিক চিকিৎসালয়ত চিকিৎসাধীন হৈ আছে ৷
এই ঘটনাৰ পাচতো মহাভৈৰৱ আৰক্ষীয়ে সমগ্ৰ ঘটনাক গাপ দিয়াৰ চেষ্টা কৰাৰ লগতে ভুক্তভোগী পৰিয়ালটোক অশালীন ব্যৱহাৰ কৰা বুলি অভিযোগ উত্থাপন হোৱাত পৰিস্থিতি উত্তপ্ত হৈ পৰিছে ৷ জানিব পৰা মতে অভিযুক্ত সুমন বৰা,শৰত দাস আৰু ৰক্তিম দাস মৰাভৰলীৰ নিবাসী আৰু বিধায়ক ৰাজেন বৰঠাকুৰৰ আশীষধন্য জিতেন দাস নামৰ ঠিকাদাৰজনৰ আত্মীয় ৷ সেয়েহে গোচৰীয়াক আৰক্ষীয়ে কোনোধৰণৰ সঁহাৰি জনোৱা নাই বুলি জানিব পৰা গৈছে ৷
আৰু পঢ়ক : হোজাইত একেটা পৰিয়ালৰে তিনিজনৰ আত্মহত্যা
