আমগুৰি, ২৭ জুনঃ শিৱসাগৰৰ আমগুৰিত দৰিদ্ৰ পৰিয়ালৰ ছাত্ৰ-ছাত্ৰীৰ মাজত বিনামূলীয়াকৈ পাঠ্যপুথি বিতৰণ কৰে ৷ চামগুৰিৰ বিশিষ্ট শিক্ষাবিদ, চামগুৰি মজলীয়া বিদ্যালয়ৰ প্ৰতিষ্ঠাপক স্বৰ্গীয় ৱালিউদ্দিন আহমেদৰ সোঁৱৰণিত দুখীয়া ছাত্ৰ-ছাত্ৰীক পাঠ্যপুথি বিতৰণ কৰে সমাজকৰ্মী তথা বিশিষ্ট ব্যৱসায়ী গালিব মহম্মদ চামচুজ জামানে ৷
হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ণ দৰিদ্ৰ পৰিয়ালৰ ছাত্ৰ-ছাত্ৰী সকলৰ বাবে আমগুৰিৰ চামগুৰিত ব্যৱসায়ী গালিব মহম্মদ চামচুজ জামানে (দাদু) নিজা বাসগৃহত বিনামূলীয়াকৈ কিতাপ বিতৰণ কৰে ৷ লগতে একোখনকৈ ফুলাম গামোচাৰে ছাত্ৰ-ছাত্ৰী সকলক সম্ভাষণ জনায় জামানৰ পৰিয়ালটোৱে ৷ ছাত্ৰ-ছাত্ৰী সকলক শিক্ষাৰ ক্ষেত্ৰত উৎসাহ জনোৱাৰ উদ্দেশ্যেই এই অনুষ্ঠানটোৰ আয়োজন কৰিছে বুলি সাংবাদিকৰ আগত মন্তব্য কৰে চামচুজ জামানে । অনুষ্ঠানত ৩০ জনকৈ দৰিদ্ৰ সীমাৰেখাৰ তলৰ ছাত্ৰ-ছাত্ৰীক সম্পূৰ্ণ কিতাপ পত্ৰৰ যোগান ধৰে জামানে ।
উক্ত অনুষ্ঠানটিত নীলাক্ষি মেম'ৰিয়েল একাডেমিৰ অধ্যক্ষ ধৰ্মৰঞ্জন গগৈ, ছাত্ৰ মুক্তি সংগ্ৰাম সমিতিৰ কেন্দ্ৰীয় সাংগঠনিক সম্পাদক ঋতুমণি হাজৰিকা, শিৱসাগৰ জিলাৰ যুটীয়া সম্পাদক সীমান্ত গগৈ, কাৰ্যকৰী সভাপতি পল্লব শইকীয়া উপস্থিত থাকে । উক্ত অনুষ্ঠানতে নিলাক্ষী মেম'ৰিয়েল একাডেমিৰ অধ্যক্ষ ধৰ্মৰঞ্জন গগৈয়ে মাউৎ গাঁৱৰ ঘাটমাউৰা ছাত্ৰী পিংকি তামুলীক বিনামূলীয়াকৈ পঢ়োৱাৰ সিদ্ধান্ত গ্ৰহণ কৰে । নিলাক্ষী মেম'ৰিয়েল একাডেমীৰ অধ্যক্ষৰ এই মানৱীয়তাৰ বাবে ছাত্ৰ মুক্তি সংগ্ৰাম সমিতিৰ সদস্য সকলে ধন্যবাদ জ্ঞাপন কৰে । বিশিষ্ট ব্যৱসায়ী গালিব মহম্মদ চামচুজে ব্যক্তিগতভাবে অনুষ্ঠিত কৰা এই পদক্ষেপক বিভিন্ন দল সংগঠনৰ লগতে স্থানীয় ৰাইজে ধন্যবাদৰ লগতে কৃতজ্ঞতা জনাইছে ৷
লগতে পঢ়ক- স্তব্ধ শিৱসাগৰৰ জীৱন যাত্ৰাঃ লক ডাউনৰ প্ৰভাৱ
