ডিব্ৰুগড়,5 জুন : প্ৰায়ে নিমাওমাও হৈ থকা ডিব্ৰুগড়ৰ অগপৰ কাৰ্যালয়ত হঠাৎ বিজেপি নেতা কৰ্মীৰ ভিৰ । উপস্থিত কেন্দ্ৰীয় মন্ত্ৰী ৰামেশ্বৰ তেলীও । অগপ-বিজেপিৰ মিত্ৰতা পূৰ্বেও আছিল যদিও অগপৰ কাৰ্যালয়ত এনে পৰিবেশ খুবেই কম দেখা যায় । এই ছবিখনে মিত্ৰতাৰ ওপৰিও যেন অগপ বিজেপিৰ ঘনিষ্ঠতা বৃদ্ধিৰ ইংগিতো বহন কৰিছে ৷
শুকুৰবাৰে ডিব্ৰুগড়লৈ আহিছিল অগপৰ দলীয় নেতা তথা মন্ত্ৰী অতুল বৰা । মন্ত্ৰী গৰাকী উপস্থিত হৈছিল অগপ কাৰ্যালয়ত ৷ তাৰ পাছতে অগপ কাৰ্যালয়লৈ আহিল বিজেপিৰ জেষ্ঠ নেতা ৰামেশ্বৰ তেলী ৷ লগতে অগপ বিজেপিৰ কৰ্মীৰে ভৰি পৰিল ডিব্ৰুগড়ৰ অগপৰ কাৰ্যালয় । অনুষ্ঠিত হয় দুয়ো দলীয় কৰ্মীৰে অগপ বিজেপি নেতৃত্বতৰ সভা । সভাত উপস্থিত চাবুৱাৰ অগপ বিধায়ক পোনাকণ বৰুৱা, বিজেপিৰ বিধায়ক তেৰছ গোৱালাও । ডিব্ৰুগড়ৰ অভিভাৱক মন্ত্ৰী হিচাপে দ্বায়িত্বভাৰ লাভ কৰা মন্ত্ৰী অতুল বৰাক ডিব্ৰুগড়ৰ সাংসদ হিচাপে অভিনন্দন জ্ঞাপন কৰে ৰামেশ্বৰ তেলীয়ে ।
অতুল বৰাই লাভ কৰা অসম চুক্তি ৰূপায়ণ দপ্তৰৰ ৰূপায়ণ নোহোৱা গুৰুত্বৰ বিষয় সমূহত কাৰ্যকৰী কৰাৰ আহ্বান জনায় ৰামেশ্বৰ তেলীয়ে । উল্লেখ যে ক’ভিড প্ৰটকলৰ প্ৰসংগত শুকুৰবাৰে দিনৰ ভাগত ডিব্ৰুগড়ৰ উপায়ুক্ত কাৰ্যালয়ত কেতবোৰ গুৰুত্বপূৰ্ণ মন্তব্য কৰে ৷
লগতে পঢ়ক : নিনং এৰিঙৰ সমৰ্থনত উত্তৰ পূৱৰ ছাত্ৰ সমাজৰ ‘টুইটাৰ ষ্টৰ্ম’
