বঢ়মপুৰ, 8 জুনঃ কপিলী নদীৰ বাঢ়নী পানীয়ে এতিয়া শংকিত কৰিছে চাংচকী গাঁৱৰ শতাধিক লোকক । কপিলী নদীৰ উফন্দি অহা পানীয়ে ইতিমধ্যে অঞ্চলটোৰ মথাউৰি ভাঙি জলমগ্ন কৰিছে বহু কেইটা অঞ্চল ৷ অৱশেষত চৰকাৰ তথা গড়কাপ্তানী বিভাগৰ সহায়ৰৰ অপেক্ষাৰ আশা বাদ দি হাতত কোৰ পাচি লৈ নিজেই মথাউৰি নিৰ্মাণ কৰিবলৈ ওলাই আহিল চাংচকী গাঁৱৰ শতাধিক লোক ৷
চৰকাৰ তথা জলসম্পদ বিভাগটোলৈ বাট নাচাই দান বৰঙণিৰে ৰাইজে শ্ৰমদান কৰি নিৰ্মাণ কৰিছে মথাউৰিটো ৷ বিগত সময়ত মথাউৰিটো নিৰ্মাণৰ বাবে চাংচকী পঞ্চায়তৰ ফালৰ পৰা আঁচনিৰ কাম ৰূপায়ণ কৰা হৈছিল যদিও কিছু পৰিমাণৰ কাম কৰিয়েই দায়িত্ব সামৰিলে পঞ্চায়তখনে ৷ যাৰ বাবে বছৰৰ প্ৰথমটো বানতে মথাউৰি ওপৰৰে পানী বাগৰি ভাঙি নিয়ে মথাউৰিটোৰ কেইবাটাও অংশ ৷
কৃষি প্ৰধান অঞ্চল চাংচকীৰ এই মথাউৰিটোৰ ওপৰতেই স্থানীয় ৰাইজৰ খেতি পথাৰ,বাসগৃহ সমূহ নিৰ্ভৰশীল। অন্যথা বাঢ়নী পানীয়ে প্ৰায়ে নষ্ট কৰি আহিছে ৰাইজৰ খেতি পথাৰকে ধৰি বাসগৃহ । যাৰ বাবে জলসম্পদ বিভাগলৈ বাট নাচাই অৱশেষত ৰাইজেই নিজেই নিৰ্মাণ কৰিবলৈ আগবাঢ়ি আহিছে মথাউৰিটো ।
লগতে চাওকঃ হাইস্কুল শিক্ষান্তত হিন্দী বিষয়ত সৰ্বোচ্চ নম্বৰ লাভ সৰভোগৰ দীক্ষিতা দাসৰ
