নগাঁও, 8 নৱেম্বৰ : এগৰাকী শিক্ষকৰ ব্যতিক্ৰমী প্ৰয়াস । পেছাগতভাৱে শিক্ষক যদিও শিল্পকৰ্মৰ সৈতে ওতঃপ্ৰোতভাৱে জড়িত হৈ পৰিছে ব্যক্তিগৰাকী । নগাঁৱৰ হাতীচুং ব্ৰাহ্মণ গাঁৱৰ এইগৰাকী শিক্ষকৰ নাম অজিত চন্দ্ৰ বৰা । নিজ বাসগৃহক এতিয়া শিল্পাশ্ৰমলৈ পৰিণত কৰাৰ প্ৰয়াস কৰিছে শিক্ষক অজিত চন্দ্ৰ বৰাই । বহুকেইখন দৃশ্য শিল্পীগৰাকীৰ বাসগৃহৰ দেৱালত দেখা পোৱা গৈছে । য'ত ভাস্কৰ্যৰ জৰিয়তে প্ৰতিফলিত কৰিব বিচাৰিছে অসমৰ ঐতিহ্য । দেৱালত নিৰ্মাণ কৰিছে অসমৰ বিহু নৃত্যৰ ভাস্কৰ্য, নিৰ্মাণ কৰিছে ৰংঘৰৰ ভাস্কৰ্য ।
কেৱল এয়াই নহয় নাও খেল, মণিপুৰী নৃত্য, মাঘ বিহুৰ সময়ৰ ম'হ যুজঁ আদিৰ ভাস্কৰ্য ঘৰৰ দেৱালতে নিৰ্মাণ কৰি সংৰক্ষণৰ চেষ্টা কৰিছে অজিত চন্দ্ৰ বৰাই । দেৱালত ইতিমধ্যেই অসমৰ ঐতিহ্য বহনকাৰী প্ৰতীকসমূহ ভাস্কৰ্যৰ ৰূপত নিৰ্মাণ কাৰ্য সম্পূৰ্ণ হৈছে যদিও কেৱল ৰং দিবলৈহে বাকী ।
কেৱল দেৱালত ভাস্কৰ্য নিৰ্মাণ কৰাই নহয়, এইগৰাকী শিল্পী অজিত চন্দ্ৰ বৰাই চিত্ৰশিল্পৰ জৰিয়তে বনজ সম্পদ ধ্বংসৰ প্ৰতিবাদ কৰাৰ উপৰিও যৌন সমস্যা, দৰিদ্ৰতা আদি কেবাটাও গুৰুত্বপূৰ্ণ বিষয় প্ৰতিফলিত কৰিছে । নিজ বাসগৃহতে আইক বচাওক, ক্ষুধা, ভুলৰ পৰিনাম, পৰাধীন, প্ৰকৃতি আৰু মানুহ, যৌন সমস্যা আদি নামেৰে অংকন কৰিছে চিত্ৰ ।
১৯৮৩ চনৰ অসম আন্দোলনৰ পটভূমিত অংকন কৰা হৈছে আইক বচাওক নামেৰে নামাকৰণ কৰা চিত্ৰ । একেদৰে দৰিদ্ৰতাক প্ৰতিফলিত কৰা উদ্দেশ্যে ক্ষুধা নামৰ চিত্ৰখন অংকন কৰাৰ সমান্তৰালকৈ প্ৰকৃতি আৰু মানুহ নামৰ চিত্ৰখনৰ জৰিয়তে বন ধ্বংসৰ বিৰুদ্ধে প্ৰতিবাদ কৰিছে চিত্ৰশিল্পী গৰাকীয়ে । ইয়াৰোপৰি জ্বলি জ্বলি শেষ হোৱা মই হ’লো ম'মৰ টুকুৰা আদি ছবিৰ জৰিয়তে বাস্তৱ জীৱনক প্ৰতিফলিত কৰিছে শিল্পী অজিত চন্দ্ৰ বৰাই ।
শেহতীয়াকৈ চিত্ৰশিল্পৰ প্ৰসাৰৰ উদ্দেশ্যে গাঁৱতে অজিত চন্দ্ৰ বৰাই স্থাপন কৰিছে শ্ৰীমন্ত শংকৰদেৱ চিত্ৰকলা বিদ্যালয় । ৮০ দশকতে প্ৰখ্যাত চিত্ৰশিল্পী প্ৰণৱ বৰুৱাৰ পৰা চিত্ৰশিল্পৰ শিক্ষা গ্ৰহণ কৰিছিল অজিত চন্দ্ৰ বৰাই । সেই সময়ৰ পৰাই নীৰৱে শিল্পকৰ্ম কৰি আহিছে এইগৰাকী অজিত চন্দ্ৰ বৰাই ।
লগতে পঢ়ক : প্ৰয়াত বিধায়ক ৰাজেন বৰঠাকুৰৰ সোঁৱৰণত কৰ্ণ-পৰ্ব ভাওনা প্ৰদৰ্শন
