যোৰহাট,11 জুন : যোৰহাট চহৰৰ গুৰুত্বপূৰ্ণ পথ সমূহৰ ভিতৰত অন্যতম মিঠাপুখুৰী পথৰ সৈতে সংযোগ কৰা মনিৰাম দেৱান পথটোৰ কিছু অংশ বিগত ৫ দিন ধৰি বন্ধ হৈ আছে ৷ পথটোৰ কাষতে থকা শক্তিশালী যুৱ ছাত্ৰ পৰিষদ নামৰ সংগঠনটোৰ যোৰহাট জিলা সমিতিৰ আভ্যন্তৰীণ কন্দলৰ বাবে যোৱা ৭ জুন তাৰিখৰ দিনা জিলা প্ৰশাসনে তলা লগাই দিছিল ৷ জানিব পৰা মতে, এই সংগঠনটোত দুটাকৈ ফৈদ সৃষ্টি হোৱাত যোৰহাট জিলা প্ৰশাসনে কাৰ্যালয়টো বন্ধ কৰি দিবলৈ বাধ্য হয় ৷ এই দুয়ো ফৈদৰ মাজৰ অন্তৰ্কন্দলৰ ফলত আদালতত গোচৰ চলি থকাৰো তথ্য লাভ কৰা হৈছে ৷
কিন্তু, এনেদৰে ৫ দিন ধৰি পথটোৰ মূল সংযোগস্থলীত বাঁহৰ ভেটি দি ৰখাৰ বাবে জনসাধাৰণে ব্যাপক সমস্যাৰ সন্মুখীন হৈছে ৷ সম্পূৰ্ণৰূপে বাঁহেৰে ভেটি দিয়াৰ ফলত তিনিখনকৈ চৰকাৰী বিদ্যালয়লৈ অহা-যোৱা কৰাটো কষ্টৰ সন্মুখীন হৈছে বিদ্যালয়ৰ ছাত্ৰ-ছাত্ৰীসকল ৷ আনহাতে,কাৰ্যালয়টোৰ অহৰহ নিৰীক্ষণৰ দায়িত্বত ৰখা হৈছে আৰক্ষী ৷ কিন্তু মনিৰাম দেৱান পথটো মুকলি কৰি নিদিয়াৰ বাবে তীব্ৰ সমস্যাৰ সন্মুখীন হৈছে অঞ্চলটোৰ ৰাইজ ৷
