গুৱাহাটীত উত্তৰ-পূৰ্বাঞ্চল ভিত্তিক বিশেষ কৃষি সমাৱেশ

মহানগৰীত শুকুৰবাৰে অনুষ্ঠিত হয় কৃষিখণ্ডৰ উত্তৰ-পূৰ্বাঞ্চল ভিত্তিক এক বিশেষ সমাৱেশ । অৰুণাচল প্ৰদেশ ৰাজ্যিক চৰকাৰৰ উদ্যোগত অনুষ্ঠিত উক্ত সমাৱেশত উপস্থিত থাকে অসমৰ মুখ্যমন্ত্ৰী সৰ্বানন্দ সোণোৱাল, অৰুণাচল প্ৰদেশৰ মুখ্যমন্ত্ৰী পেমা খাণ্ডুকে প্ৰমুখ্য কৰি উত্তৰ-পূৰ্বাঞ্চলৰ আটাইকেইখন ৰাজ্যৰ প্ৰতিনিধিৰ লগতে সকলো শীৰ্ষ আমোলা-বিষয়া তথা  ৰাজ্যিক সচিব প্ৰধানসকল ।

গুৱাহাটী, 2 আগষ্ট: শুকুৰবাৰে মহানগৰীৰ জালুকবাৰীস্থিত পঞ্চতাৰকা হোটেল ৰেডিচন ব্লু'ত অনুষ্ঠিত হয় ভাৰতীয় কৃষিখণ্ডৰ উত্তৰ-পূৰ্বাঞ্চল ভিত্তিক এক বিশেষ সমাৱেশ ৷ উত্তৰ-পূৰ্বাঞ্চলৰ কৃষিখণ্ডক সামগ্ৰিকভাৱে ৰাষ্ট্ৰীয় পৰ্যায়লৈ আগুৱাই নিয়াত উত্তৰ-পূবৰ আটাইকেইখন ৰাজ্যৰ মাজত সমন্বয় স্থাপনৰ লগতে সহযোগিতা বৃদ্ধিৰ উদ্দেশ্য আগত ৰাখি আয়োজন কৰা হয় বিশেষ সমাৱেশ ৷ অৰুণাচল প্ৰদেশ ৰাজ্যিক চৰকাৰৰ উদ্যোগত অনুষ্ঠিত উক্ত সমাৱেশত উপস্থিত থাকে মুখ্যমন্ত্ৰী সৰ্বানন্দ সোণোৱাল, অৰুণাচল প্ৰদেশৰ মুখ্যমন্ত্ৰী পেমা খাণ্ডুকে প্ৰমুখ্য কৰি উত্তৰ-পূৰ্বাঞ্চলৰ আটাইকেইখন ৰাজ্যৰ প্ৰতিনিধিৰ লগতে সকলো শীৰ্ষ আমোলা-বিষয়া ।

মুখ্যমন্ত্ৰী সোণোৱালে বৰ্তমানৰ নৰেন্দ্ৰ মোডী নেতৃত্বাধীন এন.ডি.এ. চৰকাৰে কৃষিক্ষেত্ৰৰ বাবে গ্ৰহণ কৰা কল্যাণকামী আঁচনি সম্বন্ধে ভাষণ প্ৰসংগত উল্লেখ কৰে ৷ তদুপৰি 2024 চনৰ ভিতৰত কেন্দ্ৰীয় চৰকাৰে দেশৰ অৰ্থনীতিক 5 ট্ৰিলিয়ন অৰ্থনীতিলৈ বৃদ্ধি কৰাৰ সন্দৰ্ভত উত্তৰ- পূবৰ সকলো ৰাজ্যই একেলগে কাম কৰাৰ বাবে বদ্ধপৰিকৰ বুলি মন্তব্য কৰে ৷ এই লক্ষ্য বাস্তৱায়িত কৰিবৰ বাবে বৰ্তমান চৰকাৰে দেশৰ কৃষিখণ্ডসহ প্ৰাথমিক বৃত্তিখণ্ডক অধিক অগ্ৰাধিকাৰ প্ৰদান কৰিব বুলি উল্লেখ কৰে ৷ ইফালে কৃষিক্ষেত্ৰত বিকাশৰ উদ্দেশ্যে নীতি আয়োগে ন জনীয়া সদস্যৰ এখন উচ্চস্তৰীয় কমিটি গঠন কৰাৰ কথা অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে ভাষণ প্ৰসংগত উল্লেখ কৰে ৷