গুৱাহাটী, 28 অক্টোবৰ: সমগ্ৰ দেশতে পোহৰৰ উৎসৱ দেৱালীৰ লগতে কালিপূজাৰ উখল-মাখল পৰিৱেশ । ৰাজ্যৰ বিভিন্ন প্ৰান্তৰ লগতে মহানগৰী গুৱাহাটীত কালিপূজা উপলক্ষে পূজা কমিটিসমূহে নিৰ্মাণ কৰিছে বিভিন্ন থিমৰ ওপৰত মণ্ডপ । কোনোবাই নিৰ্মাণ কৰিছে ডিজনীলেণ্ড পেৰিছৰ আৰ্হিত পূজা মণ্ডপ, কোনোবাই আকৌ মণ্ডপ নিৰ্মাণ কৰিছে সম্পূৰ্ণ বাঁহ-বেতেৰে । প্ৰধানমন্ত্ৰী নৰেন্দ্ৰ মোদীয়ে দেশবাসীক প্লাষ্টিক বৰ্জন কৰিবলৈ আহ্বান জনোৱাৰ পিছৰে পৰা কি দুৰ্গা পূজা, কি কালি পূজা সকলোতে এতিয়া পূজা কমিটিসমূহে মণ্ডপ নিৰ্মাণ ক্ষেত্ৰত বাঁহ-বেতৰ সামগ্ৰী ব্যৱহাৰ কৰাৰ লগতে ৰাইজক পৰিৱেশ আৰু প্ৰকৃতি সংৰক্ষণৰ আহ্বান জনোৱা পৰিলক্ষিত হৈছে । মহানগৰীৰ কালাপাহাৰৰ আমাদেৰ সংঘই প্ৰধানমন্ত্ৰীৰ প্লাষ্টিক বৰ্জনৰ আহ্বানক সঁহাৰি জনাই সম্পূৰ্ণ বাঁহেৰে নিৰ্মাণ কৰিছে পূজা মণ্ডপ । ষ্টেভেন স্পীলবাৰ্গৰ নিৰ্দেশনাত ১৯৯৩ চনত নিৰ্মিত হোৱা হলিউদৰ বিখ্যাত ছবি জুৰাচিক পাৰ্কৰ আৰ্হিত পূজা মণ্ডপ নিৰ্মাণ কৰি আমাদেৰ সংঘই ৰাইজক আহ্বান জনাইছে পৰিৱেশ আৰু প্ৰকৃতি সংৰক্ষণৰ । মানৱ সমাজে নিজৰ স্বাৰ্থ পূৰণৰ উদ্দেশ্যে যি হাৰত গছ-গছনি কাটি নিঃশেষ কৰি আছে এই হাৰত যদি গছ-গছনি নিঃশেষ কৰি থাকে তেন্তে ভৱিষ্যতে ডাইনছৰৰ নিচিনা পৃথিৱীৰ বুকুৰ পৰা নিঃশেষ হৈ যাব প্ৰকৃতিৰ বহু মূল্যবান সম্পদ । প্ৰকৃতি আৰু পৰিৱেশ সংৰক্ষণৰ মাধ্যমেৰে এই মূল্যবান সম্পদ ৰক্ষা কৰিবলৈ ৰাইজক আহ্বান জনাইছে পূজা কমিটিয়ে । মাত্ৰ ২ লাখ টকা ব্যয়ৰে নিৰ্মাণ কৰা এই জুৰাচিক পাৰ্কৰ আৰ্হিৰ কালিপূজা মণ্ডপটোৱে ৰাইজৰ দৃষ্টি আকৰ্ষণ কৰিছে ।
লগতে পঢ়কঃ মুখ্যমন্ত্ৰী আঠ নম্বৰৰ সন্তান, হিমন্ত চাৰি নম্বৰৰ: আজমল
দুদিনীয়া কাৰ্যসূচীৰে অনুষ্ঠিত এই পূজাত পূজা কমিটিয়ে সোমবাৰে দ্বিতীয় দিনৰ অনুষ্ঠানত শিশু সকলৰ শাৰীৰিক আৰু মানসিক বিকাশৰ বাবে শিশু সকলৰ মাজত বিভিন্ন প্ৰতিযোগিতা অনুষ্ঠিত কৰিছে । নিশাৰ ভাগত স্থানীয় শিশু সকলে বিভিন্ন সংস্কৃতিক অনুষ্ঠান পৰিবেশন কৰিব বুলি জানিব পৰা গৈছে ।
