গুৱাহাটী, 10 এপ্ৰিল: ‘‘মোডী চৰকাৰ, ভাৰতৰ নাগৰিকৰ তেজখোৱা চৰকাৰ । হিতাধিকাৰী সৃষ্টিৰে জনতাক কিনিছে । দেশত আৰ্থিক সংকট দেখা দিবলৈ বেছি দিন নাই । শ্ৰীলংকাৰ নেপালৰ পৰিস্থিতি দিশে আগবাঢ়িছে দেশ (Indian economy heading towards becoming Nepal or Srilanka) ৷" দেওবাৰে অনুষ্ঠিত এখন সংবাদমেলত এইদৰে মন্তব্য কৰে শিৱসাগৰৰ বিধায়ক অখিল গগৈয়ে (Akhil Gogoi criticizes BJP government over price hike) ৷
দেশত পেট্ৰ’ল-ডিজেলৰ মূল্যবৃদ্ধি সন্দৰ্ভত সৰৱ হৈ ৰাইজৰ দলৰ সভাপতিগৰাকীয়ে ৰাছিয়া-ইউক্ৰেইনৰ যুদ্ধৰ (Russia Ukraine war) ফলত ইন্ধনৰ মূল্য বৃদ্ধি হোৱা বুলি বিজেপি চৰকাৰে জনতাক মিছা প্ৰচাৰ চলাইছে বুলিও মন্তব্য কৰে । পেট্ৰ’ল-ডিজেলৰ মূল্যবৃদ্ধি (Fuel price hike in India) বাবে কেন্দ্ৰীয় আৰু ৰাজ্য চৰকাৰক জগৰীয়া কৰে বিধায়কগৰাকীয়ে ৷
বিধায়ক গগৈয়ে পূৰ্বৰ মনমোহন সিঙৰ কংগ্ৰেছ চৰকাৰ আৰু বৰ্তমানৰ মোদী চৰকাৰে পেট্ৰ’ল-ডিজেলত আৰোপ কৰা কৰৰ তুলনা কৰি কয় যে, আন্তৰ্জাতিক বজাৰত আজিৰ দিনটোত প্ৰতি বেৰেল খাৰুৱা তেলৰ মূল্য 102.80 ডলাৰ । 2014 চনৰ মে’ মাহত মনমোহন সিঙৰ চৰকাৰৰ দিনত খাৰুৱা তেলৰ প্ৰতি বেৰেলত দাম হৈছিল 105.7 ডলাৰ ।
কিন্তু বৰ্তমান সময়ৰ দৰে পেট্ৰ’ল-ডিজেলৰ মূল্য সেই সময়ত বৃদ্ধি হোৱা নাছিল । সিং চৰকাৰৰ দিনত আন্তৰ্জাতিক বজাৰত খাৰুৱা তেলৰ দাম সৰ্বাধিক 145 ডলাৰ হৈছিল ৷ পিছে সেই সময়ত দেশত প্ৰতিলিটাৰ পেট্ৰ’লত সৰ্বাধিক দাম আছিল 71.42 টকা ৷ একেদৰে প্ৰতিলিটাৰ ডিজেল 55.49 টকা ।
শেহতীয়াকৈ ৰাজ্যত পেট্ৰ’ল-ডিজেলৰ মূল্যবৃদ্ধিৰ কাৰণ ব্যাখ্যা কৰি গগৈয়ে কয়, গুৱাহাটীত আজি প্ৰতিলিটাৰ পেট্ৰ’লত 105.66 টকা । য’ত 45.50 টকা কেন্দ্ৰীয়-ৰাজ্য চৰকাৰৰ কৰ লাগিছে । কেন্দ্ৰীয় মোডী চৰকাৰে 27.90 টকা আৱকাৰী কৰ আৰু হিমন্ত চৰকাৰে 17.60 টকা কৰ লগাইছে ।
গুৰুত্বপূৰ্ণ কথা যে, মনমোহন চৰকাৰৰ দিনত পেট্ৰ’লত সৰ্বাধিক কেন্দ্ৰীয় কৰ 9.45 টকা আৰু ৰাজ্য কৰ 3.56 টকা বুলি তেওঁ জানিবলৈ দিয়ে । আনহাতে, প্ৰতিলিটাৰ ডিজেল আজি গুৱাহাটীত 91.55 টকা । য’ত 34.24 টকা কেন্দ্ৰীয়-ৰাজ্য কৰ লাগিছে বুলি তেওঁ কয় ।
কেন্দ্ৰীয়-ৰাজ্য চৰকাৰে অত্যাধিক কৰ আৰোপ কৰি জনতাক হাৰাশাস্তি কৰা ফলতে বৃদ্ধি হৈছে পেট্ৰ’ল-ডিজেলৰ মূল্য বুলি উল্লেখ কৰি তেওঁ কয়-বিগত 7 বছৰত মোডী চৰকাৰে 26 লাখ কোটি টকা পেট্ৰ’ল-ডিজেলত কৰ সংগ্ৰহ কৰিছে । তাৰ পাছতো আজি দেশ দেউলীয়া । আনহাতে মনমোহন সিঙৰ দিনত ৰন্ধন গেছ ছিলিণ্ডাৰ দাম আছিল 441 টকা ।
তাৰ এতিয়া দুগুণ হৈ 998 টকা হ’ল । ইয়াৰ উপৰিও নিৰ্মাণ সামগ্ৰী, খাদ্য সামগ্ৰী, দৰৱ আদি মূল্যবৃদ্ধিৰ ফলত জনতা জুৰুলা হৈ পৰিছে বুলিও গগৈয়ে কয় । ইফালে মোদীৰ নেতৃত্বত ভাৰতক বিজেপিয়ে বিশ্বগুৰু আসনত প্ৰতিষ্ঠা কৰিব বুলি কৰি অহা মন্তব্যক কটাক্ষ কৰি গগৈয়ে কয় যে, ‘‘মূল্যবৃদ্ধিত বিশ্বগুৰু হ’ব পাৰিব ভাৰত’’ ৷
লগতে পঢ়ক : শ্ৰীলংকা, নেপালৰ দৰে হ’ব নেকি ভাৰতৰ অৱস্থা ?
