চাহ উদ্যোগ উন্নয়নৰ বাবে কমিটি গঠনৰ ঘোষণা পাটোৱাৰীৰ

অসমৰ চাহ উদ্যোগৰ উন্নয়নৰ বাবে বিশেষ ব্যৱস্থা গ্ৰহণৰ কথা ঘোষণা কৰিছে অসমৰ উদ্যোগমন্ত্ৰী চন্দ্ৰমোহন পাটোৱাৰীয়ে ৷ এক বিশেষ কমিটি গঠনৰ জৰিয়তে চাহ উদ্যোগক আন্তঃৰাষ্ট্ৰীয় পৰ্যায়ত প্ৰতিষ্ঠিত কৰাৰ কথা জানিবলৈ দিয়ে তেওঁ ৷

গুৱাহাটী, 21 আগষ্ট : যোগান আৰু চাহিদাৰ মাজত ব্যৱধান বৃদ্ধি পোৱাৰ ফলত অসমৰ চাহৰ মানদণ্ড নিম্নগামী হৈ আহিছে ৷ আয়ৰ তুলনাত ব্যয় বৃদ্ধি পোৱাত চহা খেতিয়ক সকল সন্মুখীন হৈছে বিভিন্ন সমস্যাৰ ৷ অসমৰ চাহ উদ্যোগক সংকটৰ পৰা উদ্ধাৰ কৰিবলৈ বহু সময়ত চৰকাৰক আহ্বান জনাই আহিছে চাহ উদ্যোগীসকলে ৷ সেয়েহে, বুধবাৰে এই সমস্যা সমাধানৰ বাবে চাহ উদ্যোগীসকলৰ সৈতে এক বৈঠকত মিলিত হয় অসমৰ উদ্যোগমন্ত্ৰী চন্দ্ৰমোহন পাটোৱাৰী ৷

বৈঠকৰ অন্তত পাটোৱাৰীয়ে মন্তব্য কৰে যে, অসমৰ চাহৰ মানদণ্ড উন্নত কৰিবলৈ সক্ষম হ'লেহে আন্তৰাষ্ট্ৰীয় বজাৰত ইয়াৰ গুৰুত্ব বৃদ্ধি পাব ৷ সেয়েহে এখন বিশেষ কমিটি গঠনেৰে চাহ উদ্যোগৰ বিভিন্ন বিষয়সমূহ পৰ্যবেক্ষণ কৰাৰ পদক্ষেপ গ্ৰহণ কৰিব বুলি জানিবলৈ দিয়ে মন্ত্ৰীগৰাকীয়ে ৷ বিশেষ লোকৰ দ্বাৰা এখন কমিটি গঠনেৰে ডুবাইৰ আৰ্হিত কামৰূপ গ্ৰাম্য জিলাৰ ছয়গাঁৱত এখন টি পার্ক নিৰ্মাণৰ কথা ঘোষণা কৰে পাটোৱাৰীয়ে ৷ তাৰোপৰি, উন্নত মানৰ ব্ৰেণ্ডিঙৰ জৰিয়তেহে অসমৰ চাহ উদ্যোগ আগুৱাই যাব বুলি মন্তব্য প্ৰকাশ কৰে তেওঁ ৷ যোৰহাটস্থিত টোকলাই চাহ গৱেষণা কেন্দ্ৰই উন্নত চাহ উৎপাদনৰ ক্ষেত্ৰত চাহ খেতিয়ক সকলক সহায় কৰিবৰ বাবে আগন্তক বাজেটত টোকলাই চাহ গৱেষণা কেন্দ্ৰৰ বাবে ধন ধাৰ্য কৰা হ'ব বুলি মন্তব্য কৰে পাটোৱাৰীয়ে ৷