গুৱাহাটী, ১৩ ফেব্ৰুৱাৰীঃ লোকসভাত গৃহীত হোৱা নাগৰিকত্ব সংশোধনী বিধেয়ক ২০১৬ বুধবাৰে ৰাজ্যসভাত উত্থাপন হোৱাৰ কথা আছিল । বিগত দুদিন ধৰি বিৰোধী দলসমূহে বিধেয়কখনক লৈ ৰাজ্যসভা উত্তাল কৰি ৰখাৰ পিচতে আজি বিধেয়কখন উত্থাপন কৰাৰ পৰা বিৰত থাকে বিজেপি দল । ইয়াৰ লগতে বিৰোধীৰ প্ৰতিবাদত ৰাজ্যসভাৰ কাম-কাজ সাময়িকভাৱে স্তব্ধ হৈ পৰে ।
নাগৰিকত্ব সংশোধনী বিধেয়ক ৰাজ্যসভাত উত্থাপন নোহোৱাৰ পিচতে ৰাজ্যবাসীৰ মাজত উচাহৰ ঢল বোৱা পৰিলক্ষিত হৈছে । সদৌ অসম ছাত্ৰ সন্থাই মহানগৰীৰ শ্বহীদ ন্যাসৰ সন্মুখত মিঠাই বিতৰণ কৰি, ফটকা ফুটাই, বিহু গাই বিজয় উল্লাস পালন কৰে ।
ইয়াৰ উপৰিও এই জয় উত্তৰ পূববাসী ৰাইজৰ সন্মিলিত প্ৰতিবাদৰ প্ৰতিদান বুলি উল্লেখ কৰে ছাত্ৰ সন্থাৰ নেতৃত্বই । লগতে অনাগত দিনত জাতিবিৰোধী কাম কৰিলে লোকসভা নিৰ্বাচনত ইয়াৰ ভয়ংকৰ প্ৰতিদান লাভ কৰিব বুলি বিজেপি নেতৃত্বাধীন চৰকাৰখনক সকীয়াই দিয়ে সংগঠনৰ নেতৃত্বই ।
