নেশ্যনেল ডেস্ক, ৩ মে': জীৱনদায়িনী অক্সিজেনৰ বাবে বৰ্তমান প্ৰতি মুহূৰ্ততে যুঁজিবলগীয়া হৈছে মানৱ জাতিয়ে । অক্সিজেনৰ অভাৱৰ বাবে মৃত্যু যন্ত্ৰনাত চটফটাইছে ক'ভিড-১৯ত আক্ৰান্ত ৰোগীয়ে । সমগ্ৰ দেশতে কৰ'ণাই অবৰ্ণনীয় পৰিস্থিতিৰ সৃষ্টি কৰিছে । এই সংকটৰ সময়ত চিকিৎসা অক্সিজেনৰ ব্যৱস্থা কৰাৰ সমান্তৰালকৈ ত্ৰিপুৰাত প্ৰাকৃতিকভাৱেও অক্সিজেন যোগানৰ প্ৰয়াস কৰা হৈছে । ত্ৰিপুৰাৰ বন বিভাগে ৰাজ্যবাসীক বিশুদ্ধ বায়ু যোগানৰ বাবে এখন উদ্যান নিৰ্মাণ কৰি আছে ।
চহৰৰ ভিৰৰ পৰা কিছু নিলগত সতেজ বায়ু গ্ৰহণ কৰি, সুন্দৰ প্ৰাকৃতিক পৰিৱেশত কিছু সময় কটাই মানসিক অৱসাদ দূৰ কৰাৰ বাবে এক ব্যতিক্ৰমী পদক্ষেপ গ্ৰহণ কৰা হৈছে । এক বিশেষ সূত্ৰই জানিবলৈ দিয়া মতে, উদ্যানখনক 'অক্সিজেন উদ্যান' নামেৰে নামকৰণ কৰা হ'ব ।
উদ্যানখনৰ প্ৰৱেশদ্বাৰখনে উদ্যানখন নিৰ্মাণৰ স্পষ্ট আভাস দিছে । কিয়নো উদ্যানৰ প্ৰৱেশদ্বাৰ দেখাত হাওঁফাওঁ দৰে আৰু ইয়াক সেউজীয়া গছেৰে নিৰ্মাণ কৰা হৈছে । উদ্যানখন আগৰতলা চহৰৰ পৰা প্ৰায় ৪ কিলোমিটাৰ দূৰত অৱস্থিত । উদ্যানখন শাল গছেৰে ভৰি আছে । ২৯.৬ হেক্টৰ ভূমিত উদ্যানখন নিৰ্মাণ কৰা হৈছে । বন বিষয়া জগত বাহাদুৰ দেৱবাৰ্মাই জনোৱা মতে, উদ্যানখনৰ নিৰ্মাণকাৰ্য প্ৰায় সমাপ্ত হৈছে ।
আনুষ্ঠানিকভাৱে উদ্বোধন কৰাৰ পিছতে মানুহক প্ৰৱেশ কৰিবলৈ অনুমতি দিয়া হ'ব । উদ্যানখনৰ এফালে বহু সংখ্যক ওখ ওখ শাল গছ । লগতে আছে ত্ৰিপুৰাৰ স্থানীয় প্ৰজাতিৰ নানা ৰঙী অৰ্কিড, জোপোহা গছ, বিভিন্ন প্ৰকাৰৰ বনৌষধি, ফুল আদি । ইয়াৰ উপৰিও, বিভিন্ন প্ৰজাতিৰ চৰাই আৰু পখিলাকে ধৰি সৰু সৰু প্ৰজাতিৰ প্ৰাণী আছে উদ্যানখনত । বন বিষয়া জগত বাহাদুৰ দেৱবাৰ্মাই লগতে কয় যে, উদ্যানখনত "বন স্মাৰক" নামৰ এটা শ্বহীদ বেদী আছে ।
বন আৰু পৰিৱেশ সুৰক্ষাৰ বাবে কৰ্তব্যৰত হৈ প্ৰাণ হেৰুওৱা বন বিভাগৰ সকলো কৰ্মচাৰীৰ স্মৃতিত এই শ্বহীদ বেদী নিৰ্মাণ কৰা হৈছে । ২০২০ চনৰ ১১ ছেপ্টেম্বৰত এই স্বহীদ বেদী নিৰ্মাণ কৰা হৈছিল । উদ্যানখনত থকা এই গছবোৰৰ বিষয়ে পৰ্যটকক অৱগত কৰাৰ বাবে বন বিভাগে গছবোৰত পৃথক কিউ আৰ কোড লগাইছে । শিশুসকলৰ বাবে কিছুমান খেলৰ সামগ্ৰী আৰু যোগ প্ৰদৰ্শনৰ বাবে এক বিশেষ স্থানো আছে এই উদ্যানখনত ।
