নেশ্যনেল ডেস্ক, ৯ ছেপ্তেম্বৰ : ত্ৰিপুৰা(Tripura)ৰ ৰাজনৈতিক দলবোৰৰ বাবে এতিয়া যেন ৰাজনীতিৰ আন এটা নাম হিংসা । ৰাজনৈতিক দলৰ মাজৰ মতভেদে শান্তি বিঘ্নিত কৰিছে ৰাজ্যখনৰ । ৰাজনৈতিক দলবোৰৰ মাজত বৰ্তমান বিবাদত লিপ্ত হোৱাৰ পৰণতি বাকযুদ্ধতে সীমাৱদ্ধ হৈ থকা নাই । এটা দলৰ কৰ্মীয়ে আনটো দলৰ কৰ্মীক আক্ৰমণ কৰিবলৈও কুণ্ঠাবোধ কৰা নাই ।
সোমবাৰে চেপাহিজালা জিলাৰ অন্তৰ্গত ধনপুৰ বিধানসভা সমষ্টিত চিপিআইএম(CPIM) আৰু বিজেপি(BJP) সমৰ্থকৰ মাজত সৃষ্টি হোৱা সংঘাতত ১২ জনকৈ বিজেপি কৰ্মী আহত হোৱাৰ পাছত বুধবাৰে চিপিআইএমৰ ত্ৰিপুৰাস্থিত মুখ্য কাৰ্যালয় লণ্ড-ভণ্ড কৰে একাংশ লোকে । চিপিআইএমৰ এই ঘটনাৰ বাবে বিজেপিৰ বিৰুদ্ধে অভিযোগ উত্থাপন কৰিছে ।
কিয়নো, সোমবাৰে ধনপুৰত চিপিআইএমৰ কৰ্মীয়ে বিজেপিৰ কৰ্মীক আক্ৰমণ কৰা ঘটনাৰ গৰিহণা দি বুধবাৰে বিজেপিয়ে "ধিক্কাৰ"(Dhikkar) শীৰ্ষক সমদল উলিয়াইছিল ৷ সেই সময়চোৱাতে বিজেপি সমৰ্থকসকলে কেইবাখনো বাহন জ্বলাই দিয়ে । চিপিআইএমৰ সূত্ৰই উত্থাপন কৰা অভিযোগ অনুসৰি, বিজেপিৰ সমদল মেলাৰমথত উপস্থিত হোৱাৰ পিছতে বিজেপি সমৰ্থকৰ এটা দলে চিপিআইএমৰ মুখ্য কাৰ্যালয়ত প্ৰৱেশ কৰি কাৰ্যালয় লণ্ড-ভণ্ড কৰে ।
বিজেপি সমৰ্থকসকলে কেইবাখনো চাৰিচকীয়া বাহন আৰু বাইকত অগ্নিসংযোগ কৰে । কেৱল এয়াই নহয়, দলটোৱে চিপিআইএমদলৰ জিলা কাৰ্যালয়ৰ কাষতে থকা স্থানীয় সংবাদ গোষ্ঠীৰ কাৰ্যালয়ত প্ৰৱেশ কৰি কাৰ্যালয়টো তচনচ কৰে ।
দীঘলীয়া সময়ৰ পিছত ত্ৰিপুৰাবাসীয়ে এনে হিংসাত্মক পৰিস্থিতিৰ সাক্ষী হৈছে । ধনপুৰত চিপিআইএমৰ কৰ্মীয়ে সংঘটিত কৰা ঘটনাৰ বিৰোধিতা কৰি আয়োজিত সভাত বিজেপিৰ উপ-সভাপতি ৰাজীৱ ভট্টাচাৰ্যই কয় যে, চিপিআইএমে বিজেপিৰ ৰাজনৈতিক ভাৱমূৰ্তি কলুষিত কৰিবলৈ হিংসাৰ আশ্ৰয় লৈছে । ধনপুৰৰ ঘটনা ত্ৰিপুৰাত সাম্প্ৰদায়িক সংঘৰ্ষ সৃষ্টি কৰাৰ বাবে ৰচনা কৰা ষড়যন্ত্ৰৰ এটা অংশ ৷ তেওঁ কয় যে, বিজেপিয়ে বাওঁপন্থী দলটোৰ ষড়যন্ত্ৰ সফল হ'বলৈ নিদিয়ে । বুধবাৰে "ধিক্কাৰ" শীৰ্ষক সমদলত ৰাজীৱ ভট্টাচাৰ্যৰ উপৰিও পপিয়া দত্ত, টংকু ৰয় আৰু কল্যাণী ৰয়কে ধৰি দলৰ কেইবাজনো জ্যেষ্ঠ নেতাই অংশ লয় ।
আনহাতে, সংবাদ গোষ্ঠীৰ কাৰ্যালয় লণ্ড-ভণ্ড কৰাৰ পাছতে জ্যেষ্ঠ সাংবাদিকসকলে স্থানীয় আৰক্ষী থানাত একত্ৰিত হৈ স্পষ্টীকৰণ বিচাৰে । ইয়াৰ পাছতে কেন্দ্ৰীয় সামাজিক ন্যায় আৰু সবলীকৰণ দপ্তৰৰ ৰাজ্যিক মন্ত্ৰী প্ৰতিমা ভৌমিক আৰু তথ্য আৰু সাংস্কৃতিক পৰিক্ৰমা মন্ত্ৰী সুশান্ত চৌধুৰী সংবাদ গোষ্ঠীৰ কাৰ্যালয়ত উপস্থিত হৈ সহায় আগবঢ়োৱাৰ আশ্বাস দিয়ে । কেন্দ্ৰীয় মন্ত্ৰীগৰাকীয়ে সমগ্ৰ ঘটনাক এক ষড়যন্ত্ৰ আখ্যা দি এই ঘটনাৰ বাবে চিপিআইএমক দোষাৰোপ কৰে ।
আনহাতে, বিৰোধী দলৰ নেতা মাণিক সৰকাৰে(Manik Sarkar) এই ঘটনা সন্দৰ্ভত বিজেপিক তীব্ৰ সমালোচনা কৰি কয় যে, বিজেপি দলৰ কৰ্মকৰ্তাৰ কাণ্ডই প্ৰমাণ কৰিছে যে, শাসকীয় দলটো এতিয়া কিমান হতাশাত ভূগিছে । ৰাজ্যখনৰ কেইবাটাও স্থানত হিংসাত্মক ঘটনা সংঘটিত হোৱা বুলি জানিব পৰা গৈছে । বুধবাৰে সন্ধিয়া ত্ৰিপুৰাৰ জ্যেষ্ঠ সাংবাদিকৰ এটা প্ৰতিনিধি দলে পশ্চিম আগৰতলা আৰক্ষী থানাত একত্ৰিত হয় ৷ ১২ ঘণ্টাৰ ভিতৰত দোষীক কৰায়ত্ত কৰি কঠোৰ শাস্তিৰ ব্যৱস্থা কৰিবলৈ আহ্বান জনায় ।
লগতে পঢ়ক: ত্ৰিপুৰাত CPIM-BJPৰ সমৰ্থকৰ সংঘৰ্ষত ১২জন বিজেপি কৰ্মী আহত
