নেশ্যনেল ডেস্ক, 11 আগষ্ট : তেলেংগানাত বিজেপিৰ প্ৰাক্তন জিলা উপ-সভাপতি তথা ব্যৱসায়ী ভি. শ্ৰীনিবাসৰ মৃতদেহ তেওঁৰেই জ্বলন্ত গাড়ীৰ ট্ৰাংকত উদ্ধাৰৰ ঘটনাই সৃষ্টি কৰিছে চাঞ্চল্য ৷ মঙলবাৰে পুৱতি নিশা কোনো অচিনাক্ত দুৰ্বত্তই শ্ৰীনিবাসক তেওঁৰেই গাড়ীৰ সৈতে জ্বলাই দিয়া বুলি সন্দেহ প্ৰকাশ কৰিছে আৰক্ষীয়ে ৷
"আৰক্ষীয়ে অগ্নিকাণ্ডৰ তথ্য লাভ কৰাৰ পাছতেই ঘটনাস্থলীত উপস্থিত হয় আৰু গাড়ীৰ ভিতৰৰ ট্ৰাংকত মৃতদেহটো প্ৰত্যক্ষ কৰে ৷ আৰক্ষীয়ে প্ৰাক্তন জিলা উপ-সভাপতি গৰাকীৰ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে স্থানীয় চৰকাৰী চিকিৎসালয়লৈ প্ৰেৰণ কৰিছে । সম্প্ৰতি আৰক্ষীয়ে ভাৰতীয় দণ্ডবিধি আইনৰ অধীনত ৩০২ ধাৰাত এটা গোচৰ ৰুজু কৰি তদন্ত আৰম্ভ কৰিছে ৷" এইবুলি জনায় মেদকৰ আৰক্ষী অধীক্ষক চন্দনা দিপ্তীয়ে ৷
আৰক্ষী অধীক্ষক চন্দনা দীপ্তিয়ে অভিযুক্তৰ সন্ধানত আৰক্ষীয়ে অভিযান তীব্ৰতৰ কৰি তোলা বুলি জানিবলৈ দিছে সংবাদ মাধ্যমক ৷ আনহাতে, বিজেপিৰ এগৰাকী জিলা পৰ্যায়ৰ জ্যেষ্ঠ নেতাৰ হত্যাকাণ্ড এক ৰাজনৈতিক হত্যাকাণ্ড বুলিয়েই সৰ্বত্ৰে চৰ্চিচ হৈছে ৷
লগতে পঢ়ক : বিনেশ ফোগাটক নিলম্বন ৰেছলিং ফেডাৰেশ্যন অৱ ইণ্ডিয়াৰ
