নেশ্যনেল ডেস্ক, ২৬ অক্টোবৰ: ৰাজনৈতিক হিংসাই ভয়াৱহ ৰূপ লৈছে ত্ৰিপুৰাত । চলিত বৰ্ষত ৰাজ্যখনত এনে ধৰণৰ কেইবাটাও হিংসাত্মক ঘটনা সংঘটিত হৈছে । এনে ঘটনাৰ বাবে এটা ৰাজনৈতিক দলে আনটোক দোষাৰোপ কৰিছে । এনে পৰিস্থিতি অব্যাহত থকাৰ মাজতে এইবাৰ ৰাজ্যখনত তৃণমূল কংগ্ৰেছৰ ৰাজ্যসভাৰ সাংসদ সুস্মিতা দেৱ আক্ৰমণৰ বলি হোৱাৰ অভিযোগ উত্থাপিত হৈছে ।
দলটোৰ অভিযোগ অনুসৰি, ৰাজধানী চহৰ আগৰতলাৰ উপকণ্ঠ অঞ্চল আমতলীত আক্ৰমণৰ সন্মুখীন হয় সাংসদগৰাকী । ঘটনা সংঘটিত হোৱাৰ পাচতে সুস্মিতা দেৱে স্থানীয় আৰক্ষী থানাত অভিযোগ দাখিল কৰিছিল যদিও এই গোচৰটো সন্দৰ্ভত এতিয়ালৈকে কোনো লোকক গ্ৰেপ্তাৰ কৰা নাই আৰক্ষীয়ে । সেয়ে, স্থানীয় আৰক্ষীৰ নিষ্ক্ৰীয়তাৰ ভূমিকাত নিৰাশ হৈ তৃণমূল কংগ্ৰেছৰ সাংসদগৰাকীয়ে ত্ৰিপুৰাৰ আৰক্ষী সঞ্চালক প্ৰধানলৈ এখন পত্ৰ প্ৰেৰণ কৰিছে । এই পত্ৰখনৰ জৰিয়তে তেওঁ ৰাজ্যখনত চলি থকা আইন-শৃংখলা পৰিস্থিতিৰ ওপৰত কেইবাটাও প্ৰশ্ন উত্থাপন কৰে ।
তেওঁ পত্ৰখনত উল্লেখ কৰে যে, দলটোৱে আক্ৰমণকাৰীৰ নাম আৰু আক্ৰমণৰ সময়ৰ ফটো, ভিডিঅ' আদি প্ৰমাণ আৰক্ষীক দিছিল । কিন্তু তাৰ পাচতো আৰক্ষীয়ে কোনো লোকক গ্ৰেপ্তাৰ কৰা নাই ।
তেওঁ লগতে উল্লেখ কৰে যে, এই আক্ৰমণৰ ঘটনাত গুৰুতৰভাৱে আহত হোৱা মামন খানক কলকাতাৰ এখন চিকিৎসালয়ত ভৰ্তি কৰোৱা হৈছে আৰু বৰ্তমান তেওঁৰ অৱস্থা সংকটজনক । সাংসদগৰাকীয়ে আৰক্ষীৰ ভূমিকাত ক্ষোভ প্ৰকাশ কৰি কয় যে, গ্ৰেপ্তাৰৰ প্ৰক্ৰিয়া পলম হ'লে ই কেৱল অভিযুক্ত পলাই যোৱাতহে সহায় কৰে । আনহাতে, অভিযুক্তক গ্ৰেপ্তাৰ কৰাত পলম কিয় হৈছে সেয়া বুজি পোৱা নাই বুলিও তেওঁ মন্তব্য কৰে ।
তেওঁ অভিযোগ উত্থাপন কৰে যে, হত্যাৰ চেষ্টা কৰি এই আক্ৰমণ কৰা হৈছিল আৰু এয়া এক গুৰুতৰ ঘটনা । সেয়ে, তেওঁ শীঘ্ৰে এই সন্দৰ্ভত পদক্ষেপ ল'বলৈ ত্ৰিপুৰাৰ আৰক্ষী সঞ্চালক প্ৰধানক আহ্বান জনায় । উল্লেখ্য যে, আক্ৰমণ সংঘটিত হোৱাৰ দিনা সুস্মিতা দেৱে স্থানীয় নিকায় নিৰ্বাচনৰ বাবে আমতলীত তৃণমূল কংগ্ৰেছৰ নিৰ্বাচনী প্ৰচাৰ কাৰ্যসূচীত অংশগ্ৰহণ কৰিছিল । কিন্তু তেতিয়াই তেওঁক দুৰ্বৃত্তই আক্ৰমণৰ লক্ষ্য কৰি লয় ।
লগতে পঢ়ক:বুধবাৰে নতুন দল ঘোষণা কৰাৰ সম্ভাৱনা অমৰিন্দৰ সিঙৰ
