নেশ্যনেল ডেস্ক,২৮ আগষ্ট : প্ৰধানমন্ত্ৰী নৰেন্দ্ৰ মোডীয়ে সোমবাৰে ৫১,০০০ তকৈও অধিক যুৱক-যুৱতীক নিযুক্তি পত্ৰ প্ৰদান কৰে । ৰাষ্ট্ৰীয় ৰোজগাৰ মেলাৰ জৰিয়তে প্ৰধানমন্ত্ৰীগৰাকীয়ে নিবনুৱা যুৱক-যুৱতীসকলক নিযুক্তি পত্ৰ প্ৰদান কৰে । প্ৰধানমন্ত্ৰী মোডীয়ে অনুষ্ঠানত কয় যে দেশৰ ফাৰ্মাচিউটিকেল আৰু অটোমোবাইল উদ্যোগসমূহ দ্ৰুত গতিত বৃদ্ধি পাইছে । ভাৰতৰ অৰ্থনীতিয়ে একাধিক খণ্ডত যুৱ প্ৰজন্মৰ বাবে বহুতো উন্নয়নৰ সুযোগ প্ৰদান কৰি আহিছে বুলিও তেওঁ উল্লেখ কৰে ।
প্ৰধানমন্ত্ৰীয়ে লগতে কয় যে, ফাৰ্মা আৰু অটোমোবাইল খণ্ডৰ লগতে পৰ্যটনৰ ক্ষেত্ৰতো যথেষ্ট সুযোগ আছে আৰু ২০৩০ চনৰ ভিতৰত ই ভাৰতীয় অৰ্থনীতিত ২০ লাখ কোটি টকাৰ অধিক অৰিহণা যোগোৱাৰ সম্ভাৱনা আছে । ইয়াৰ অংশ হিচাপে যুৱসকলৰ বাবে পৰ্যটন খণ্ডত প্ৰায় ১৩ ৰ পৰা ১৪ কোটি নতুন চাকৰি সৃষ্টি হ'ব পাৰে বুলিও প্ৰধানমন্ত্ৰীয়ে আশা ব্যক্ত কৰে ।
উল্লেখ্য যে, ৰোজগাৰ মেলা সমগ্ৰ দেশৰ ৪৫ টা স্থানত অনুষ্ঠিত হয় আৰু প্ৰধানমন্ত্ৰীয়ে ভিডিঅ' কনফাৰেন্সৰ জৰিয়তে এই ৰোজগাৰ মেলা সম্বোধন কৰে ।
প্ৰধানমন্ত্ৰীগৰাকীয়ে কয় যে, এই দশকত ভাৰত বিশ্বৰ শীৰ্ষ তিনিটা অৰ্থনীতিৰ ভিতৰত এটা হ'ব । মোডীয়ে দৃঢ়তাৰে কয় যে, দেশখনে যাতে এই ক্ষেত্ৰত সফল হ'ব পাৰে সেয়া নিশ্চিত কৰাৰ দায়িত্বও তেওঁ বহন কৰিব । মোডীয়ে লগতে কয় যে, নৱ নিযুক্তসকল 'অমৃত ৰক্ষক'ৰ দৰে কাৰণ তেওঁলোকে অহা ২৫ বছৰৰ বাবে তেওঁলোকৰ নতুন ক্ষমতাত দেশৰ বাবে সেৱা আগবঢ়াব ।
নতুনকৈ নিযুক্তিপ্ৰাপ্তসকলক কেন্দ্ৰীয় ৰিজাৰ্ভ আৰক্ষী বাহিনী (চিআৰপিএফ), কেন্দ্ৰীয় ঔদ্যোগিক সুৰক্ষা বাহিনী (চিআইএছএফ), সীমান্ত সুৰক্ষা বাহিনী (বিএছএফ), সশস্ত্ৰ সীমা বল (এছএছবি), অসম ৰাইফলছ, ভাৰত-তিব্বত সীমান্ত আৰক্ষী (আইটিবিপি) আৰু নাৰ্কোটিক্স নিয়ন্ত্ৰণ ব্যুৰ' (এনচিবি)ৰ লগতে দিল্লী আৰক্ষীত নিয়োগ কৰা হৈছে । তেওঁলোকৰ পদসমূহৰ ভিতৰত আছে কেন্দ্ৰীয় গৃহ মন্ত্ৰালয়ৰ অধীনৰ বিভিন্ন বিভাগত কনিষ্টবল (সাধাৰণ কৰ্তব্য), উপ-পৰিদৰ্শক (সাধাৰণ কৰ্তব্য) আৰু অনা-সাধাৰণ কৰ্তব্য কেডাৰ (Non–General Duty Cadre) পদ ।
প্ৰধানমন্ত্ৰীয়ে উল্লেখ কৰে যে, অৰ্ধসামৰিক বাহিনীত যুৱসকলৰ বাবে নতুন পথ মুকলি কৰাৰ বাবে নিযুক্তি প্ৰক্ৰিয়াত কেইবাটাও পৰিৱৰ্তন কৰা হৈছে । নতুনকৈ অন্তৰ্ভুক্ত হোৱা নিযুক্তিপ্ৰাপ্তসকলে আইজিঅটি কৰ্মযোগী পৰ্টেলৰ এক অনলাইন মডিউল কৰ্মযোগী প্ৰাৰম্ভৰ জৰিয়তে প্ৰশিক্ষণ লাভ কৰাৰ সুযোগ পাব । য'ত ৬৭৩ টাতকৈও অধিক ই-লাৰ্ণিং পাঠ্যক্ৰম উপলব্ধ কৰা হৈছে ।
লগতে পঢ়ক :Jan Dhan Yojana revolution : জন ধন যোজনাত দেশত ৫০ কোটিৰো অধিক বেংক একাউণ্ট; বিত্ত মন্ত্ৰী
