নেশ্যনেল ডেস্ক,২৪ জুন : ক'ভিডৰ আৰম্ভণিৰে পৰা এই মহামাৰীৰ লগতে ভাইৰাছটোৰ ওপৰত বিভিন্ন ধৰণৰ পৰীক্ষা নিৰীক্ষা চলি আছে । ক'ভিড প্ৰতিৰোধৰ বিভিন্ন সঁজুলিও ইতিমধ্যে প্ৰস্তুত কৰিছে গৱেষকসকলে । ক'ভিড-১৯ ভাইৰাছ ধৰা পেলোৱা বিভিন্ন ধৰণৰ সঁজুলি উদ্ভাৱন কৰাৰো দাবী কৰি আহিছে । এইবাৰ ক'ভিডৰ সংক্ৰমণ আগতীয়াকৈ ধৰা পেলোৱা এবিধ সঁজুলি উদ্ভাৱন কৰিছে লণ্ডনৰ গৱেষকসকলে ।
আভা নামৰ এবিধ চেঞ্চৰ থকা ব্ৰেচলেটৰ জৰিয়তে মানুহে আগতীয়াকৈ জানিব পাৰিব ক'ভিড সংক্ৰমণৰ সম্ভাৱনীয়তা (Ava Fertility Tracker may detect Covid in advance)। এই ক'ভিড-১৯ ধৰা পেলোৱা এই ব্ৰেচলেট সন্দৰ্ভত ইতিমধ্যে এক অধ্যয়নো কৰা হৈছে । সেই অধ্যয়ন সম্পৰ্কে বি.এম.জে নামৰ এখন আলোচনীত প্ৰকাশ পাইছে ।
আভা ব্ৰেচলেট সাধাৰণতে নিশা শোৱাৰ সময়ত হাতৰ সৰু গাঁঠিত পিন্ধিব লাগে । ব্ৰেচলেট পিন্ধা ব্যক্তিৰ উশাহ-নিশাহৰ হাৰ, হৃদস্পন্দনৰ হাৰ, হাতৰ উষ্ণতা, তেজৰ প্ৰবাহৰ হাৰ আৰু শোৱাৰ সময় আদি জুখি উলিয়াব ।
অধ্যয়নটোৰ মতে আভা ব্ৰেচলেট ব্যৱহাৰ কৰা ব্যক্তিগৰাকীয়ে কমেও চাৰি ঘণ্টা টোপনি যাব লাগিব । গৱেষকসকলে এই অধ্যয়নত দেখিছে যে প্ৰতি ১০ ছেকেণ্ডত এবাৰকৈ ওপৰোক্ত তথ্য সংগ্ৰহ কৰি আৰু কৃত্ৰিম বুদ্ধিমত্তাৰ (AI) সহায়ত ইয়াক বিশ্লেষণ কৰি ক'ভিড-১৯ ৰ সংক্ৰমণৰ আৰম্ভণি চিনাক্ত কৰিব পাৰে (Ava Bracelet can detect Covid)। স্মাৰ্টফোন এপৰ জৰিয়তে ডাটাসমূহ বিশ্লেষণ কৰা হয় । এই ব্ৰেচলেট ২০২০ চনৰ মাৰ্চৰ পৰা ২০২১ৰ এপ্ৰিললৈ ৫১ বছৰৰ তলৰ ১,১৬৩ গৰাকী লোকৰ ওপৰত পৰীক্ষা কৰা হৈছিল ।
এই অধ্যয়নৰ সময়তে লোকসকলে আভা ব্ৰেচলেট পৰিধান কৰি নিশা শুইছিল আৰু ক'ভিডৰ সংক্ৰমণৰ আগতীয়া পৰীক্ষা কৰিছিল । যিসকলৰ দেহত ক'ভিডৰ লক্ষণবোৰ দেখাইছিল তেওঁলোকে ক'ভিড পিচিআৰ পৰীক্ষা কৰাইছিল । অধ্যয়নৰ সময়ত ১২৭ গৰাকী লোকক ক'ভিডত আক্ৰান্ত পোৱা গৈছিল ।
তেওঁলোকৰ ৬৬ গৰাকীয়ে একেৰাহে ২৯ দিন ধৰি হাতত আভা ব্ৰেচলেট পিন্ধি আছিল । প্ৰায় ৮ দিন পাছত ক'ভিডৰ লক্ষণবোৰ আগতীয়াকৈ ধৰা পৰিছিল । ইয়াৰ দ্বাৰা এটা কথা স্পষ্ট হৈ পৰিছে যে এই ধৰণৰ এআই এলগৰিথম থকা সঁজুলিয়েও ক'ভিডৰ আৰম্ভণিৰ পূৰ্বানুমান কৰিব পাৰে ।
লগতে পঢ়ক :New Covid 19 case in India: 24 ঘণ্টাত 17 হাজাৰতকৈ অধিক লোক আক্ৰান্ত
