নেশ্যনেল ডেস্ক, ১১ ফেব্ৰুৱাৰী: মাইক্ৰ ফাইনেন্স কোম্পানীৰ আৰু আন প্ৰতিষ্ঠানৰ মুঠ ১২৮.৮৬ কোটি টকাৰ স্থাৱৰ আৰু অস্থাৱৰ সম্পত্তি বাজেয়াপ্ত কৰাৰ নিৰ্দেশ এনফ'ৰ্চমেণ্ট ডাইৰেক্ট'ৰেটৰ । প্ৰকাশ কৰা মতে, চিবিআই, এছ পি ই, এছ চি বিয়ে মাইক্ৰ' ফাইনেন্স কোম্পানী লিমিটেডৰ বিৰুদ্ধে ৰুজু হোৱা গোচৰৰ ভিত্তিত তদন্ত কৰে সংস্থাটোৱে । বুধবাৰে এনফ'ৰ্চমেণ্ট ডাইৰেক্ট'ৰেট এক অস্থায়ী নিৰ্দেশনা জাৰি কৰে ।
ওড়িশাৰ বিভিন্ন আৰক্ষী থানাত চিট ফাণ্ড কেলেংকাৰী সন্দৰ্ভত ৰুজু কৰা গোচৰ আৰু অন্যান্য কেইবাটাও গোচৰৰ তদন্তৰ দায়িত্ব উচ্চতম ন্যায়ালয়ে কেন্দ্ৰীয় অনুসন্ধানকাৰী সংস্থাক অৰ্পণ কৰিছিল । উচ্চতম ন্যায়ালয়ৰ নিৰ্দেশতে মুঠ ৪৪টা গোচৰৰ তদন্ত আৰম্ভ কৰে কেন্দ্ৰীয় অনুসন্ধানকাৰী সংস্থাই । এই ৪৪টা গোচৰৰ ভিতৰত আছে মাইক্ৰ' ফাইনেন্স কোম্পানী লিমিটেডৰ কেলেংকাৰী সন্দৰ্ভত ৰুজু হোৱা গোচৰ । ভূৱনেশ্বৰত কেন্দ্ৰীয় অনুসন্ধানকাৰী সংস্থাই দাখিল কৰা চাৰ্জশ্বীটত এই তথ্য উল্লেখ কৰা হৈছে ।
