নেশ্যনেল ডেস্ক, ২৩ জানুৱাৰী: ডাউদ ইব্ৰাহীমৰ অন্যতম সহযোগী হিচাপে জনাজাত চিংকু পাঠানৰ নিৰ্দেশত চলা ড্ৰাগছৰ সকলো বেহা বন্ধ কৰাৰ বাবে তৎপৰ হৈ পৰিছে নাৰ্ক'টিক্স কন্ট্ৰ'ল ব্যুৰ' । শনিবাৰে নাৰ্ক'টিক্স কন্ট্ৰ'ল ব্যুৰ'ই পুণেৰ ভিৱান্দিত অভিযান চলায় । অভিযানৰ সময়ত এখন গহণাৰ দোকানৰ পৰা মেফেড্ৰ'ন নামৰ ড্ৰাগছ জব্দ হয় । ইয়াৰ পিছতে অভিযানকাৰী দলটোৱে গহণাৰ দোকানৰ স্বত্বাধিকাৰীক গ্ৰেপ্তাৰ কৰে ।
শুক্ৰবাৰে মুম্বাইৰ ডংৰী অঞ্চলৰ পৰা নাৰ্ক'টিক্স কন্ট্ৰ'ল ব্যুৰ'ই চিংকু পাঠানৰ দলৰ আন এজন সদস্যক গ্ৰেপ্তাৰ কৰিছিল আৰু মেফেড্ৰ'ন ড্ৰাগছ জব্দ কৰে । নাৰ্ক'টিক্স কন্ট্ৰ'ল ব্যুৰ'ই প্ৰকাশ কৰা মতে, অভিযানত উদ্ধাৰ হোৱা চিংকু পাঠানৰ দিনলিপিত ২০টা ড্ৰাগছ সৰবৰাহকাৰীৰ নাম উল্লেখ আছিল ।
ড্ৰাগছৰ অবৈধ বেহাৰ জৰিয়তে উপাৰ্জন কৰা ধন ৰাষ্ট্ৰ বিৰোধী কাৰ্য-কলাপত ব্যৱহৃত হৈছিল । লগতে নাৰ্ক'টিক্স কন্ট্ৰ'ল ব্যুৰ'ই কয় যে, গেংষ্টাৰ চিংকু পাঠানৰ বিৰুদ্ধে লাভ কৰা সকলো তথ্য এনফ'ৰ্চমেণ্ট ডাইৰেক্ট'ৰেট আৰু ৰাষ্ট্ৰীয় অনুসন্ধানকাৰী সংস্থাকো যোগান ধৰা হ'ব ।
লগতে পঢ়ক:জয় শ্ৰী ৰাম ধ্বনিৰে মমতাক আদৰণি: ভাষণ প্ৰদান কৰিবলৈ অস্বীকাৰ
