নিউজ ডেস্ক , ৯ জানুৱাৰী : দেশৰ ভিন্ন প্ৰান্তত পক্ষীকূলত পুনৰ ধৰা পৰিছে এভিয়ান ইনফ্লুয়েঞ্জা বা বাৰ্ড ফ্লুৰ অৱস্থিতি । কেন্দ্ৰীয় চৰকাৰে জনোৱা মতে এতিয়ালৈ কেৰালা, ৰাজস্থান, মধ্য়প্ৰদেশ, হিমাচল প্ৰদেশ, হাৰিয়ানা আৰু গুজৰাটত ধৰা পৰিছে বাৰ্ড ফ্লুৰ সংক্ৰমণ । ইয়াৰ মাজতে মহাৰাষ্ট্ৰতো এই ৰোগকলৈ চিন্তাত পৰিছে ৰাজ্য়খনৰ নাগৰিকসকল । কিয়নো শনিবাৰে এক শীৰ্ষ বিষয়াই জনোৱা মতে ৰাজ্য়খনৰ পৰভানি জিলাৰ মুৰুম্বা গাৱৰ এখন ফাৰ্মত মৃত্য়ু হয় প্ৰায় ৯০০ টা কুকুৰাৰ ।
জিলাখনৰ উপায়ুক্ত দীপক মুলগীকৰে সংবাদ মাধ্য়মক জনোৱা মতে কুকুৰাৰ মৃত্য়ুৰ কাৰণ জানিবলৈ ইতিমধ্যে নমুনা পৰীক্ষণৰ বাবে প্ৰেৰণ কৰা হৈছে । উপায়ুক্ত গৰাকীয়ে কোৱা মতে মাৰাথৱাদা অঞ্চলত স্বেচ্ছা সেৱী সংস্থাৰ অধীনৰ ফাৰ্মখনত দুটা দিনৰ ভিতৰত মৃত্য়ু হৈছে এই বৃহৎ সংখ্য়ক কুকুৰাৰ । অৱশ্য়ে প্ৰায় ৮০০০ কুকুৰা থকা ফাৰ্মখনৰ ৯০০ টা কুকুৰাৰ মৃত্য়ুৰ পিছত সম্প্ৰতি নতুনকৈ মৃত্য়ু হোৱা নাই কুকুৰাৰ । প্ৰথম দৃষ্টিত এয়া পুষ্টিহীনতাৰ বাবে মৃত্য়ু হোৱা বুলি ধাৰণা কৰা হৈছিল যদিও পৰীক্ষণৰ ফলাফলৰ পিছতহে সঠিককৈ ক'ব পৰা যাব বুলি জনালে উপায়ুক্ত গৰাকীয়ে ।
মহাৰাষ্ট্ৰত এতিয়ালৈ বাৰ্ড ফ্লুৰ ঘটনা পোহৰলৈ অহা নাই যদিও ২০০৬ চনত উত্তৰ মহাৰাষ্ট্ৰৰ নন্দুৰবাৰ আৰু ধুলে জিলাত বাৰ্ড ফ্লুৰ সংক্ৰমণৰ ফলত মৃত্যু হৈছিল কেইবাহাজাৰ পক্ষীৰ ।
লগতে পঢ়ক : পুনৰ ৰাজাজী ৰিজাৰ্ভলৈ স্থানান্তৰিত বাঘ
