নেশ্যনেল ডেস্ক,১৭ ছেপ্টেম্বৰ : ২০২৪ৰ লোকসভা নিৰ্বাচনত বিজেপিক প্ৰতিৰোধ কৰিবলৈ কংগ্ৰেছে ইতিমধ্যে ৰণনীতি প্ৰস্তুত কৰিছে । হায়দৰাদত অনুষ্ঠিত কংগ্ৰেছ ৱৰ্কিং কমিটিৰ বৈঠকত নিৰ্বাচন সম্পৰ্কীয় কেইবাটাও আলোচনা কৰা হৈছে । ইফালে তেলেংগানাৰ ৰাজ্যিক নিৰ্বাচনত ক্ষমতা পুনৰ দখলত আত্মবিশ্বাসী কংগ্ৰেছ ।
যোৱা মে' মাহত কংগ্ৰেছে ৫ টা গ্যেৰাণ্টিৰে কৰ্ণাটকত ক্ষমতালৈ আহিছিল । চিডব্লিউচিৰ দ্বিতীয় দিনা কংগ্ৰেছৰ সংবাদ মাধ্যমৰ মুৰব্বী পৱন খেৰাই কয় যে এতিয়া তেলেংগানা, ৰাজস্থান, মধ্য প্ৰদেশ আৰু অন্যান্য ৰাজ্যৰ লোকসকলেও একেই বিচাৰিছে ।
বিশেষজ্ঞসকলে কয় যে কংগ্ৰেছে দক্ষিণৰ ওপৰত বিশেষ গুৰুত্ব দিছে । কৰ্ণাটকত শোচনীয় পৰাজয়ৰ পাছত বিজেপি তুলনামূলকভাৱে অসুবিধাত পৰিছে । ইফালে কৰ্ণাটক নিৰ্বাচনত হোৱা বিশাল নিৰ্বাচনী বিজয়ে কংগ্ৰেছক দক্ষিণ ভাৰতত এক প্ৰকাৰৰ প্ৰত্যাৱৰ্তনৰ পথ মুকলি কৰিছিল । হিমাচল প্ৰদেশ বিধানসভা নিৰ্বাচনত জয়লাভৰ মাত্ৰ ৫ মাহ পাছত অহা এই বিজয় কংগ্ৰেছৰ এক ডাঙৰ উৎসাহ হিচাপে দেখা গৈছে ।
যোৱা দুদিনত হায়দৰাবাদত অনুষ্ঠিত হোৱা গুৰুত্বপূৰ্ণ চিডব্লিউচি বৈঠকখনে স্পষ্ট ইংগিত দিছে যে কেন্দ্ৰত পুনৰ ক্ষমতা ঘূৰাই পাবলৈ কংগ্ৰেছে দক্ষিণৰ ৰাজ্যসমূহৰ ওপৰত কিমান নিৰ্ভৰ কৰিব । কংগ্ৰেছৰ সভাপতি মল্লিকাৰ্জুন খাৰ্গেয়ে হায়দৰাবাদক চৰ্চাত ৰাখিবলৈ এক নিপুণ ৰণনীতি প্ৰস্তুত কৰিছে । কেন্দ্ৰত পুনৰ শাসনলৈ অহাৰ বাবে তেলেংগানা দখল কৰাটো গুৰুত্বপূৰ্ণ বুলি গণ্য কৰা হৈছে ।
বৈঠকত সকলোৱে এটা কথাই কৈছে যে সেই সময়ৰ কংগ্ৰেছ চৰকাৰে ২০১৪ চনত তেলেংগানাক ৰাজ্যৰ মৰ্যাদা দিছিল । কিন্তু পৰৱৰ্তী নিৰ্বাচনত মুখ্যমন্ত্ৰী কে চন্দ্ৰশেখৰ ৰাওৱে শেষ হাঁহি মাৰিছিল ।
তেলেংগানাৰ তাৎপৰ্যৰ কথা উল্লেখ কৰি খাৰ্গেয়ে জনসাধাৰণৰ সৈতে অধিক সম্পৰ্ক স্থাপনৰ বাবে এক শক্তিশালী পৰিকল্পনা প্ৰস্তুত কৰিছে । চিডব্লিউচি বৈঠকৰ দ্বিতীয় দিনা খাৰ্গেয়ে ৰাজ্যখনৰ সকলো বিধানসভা সমষ্টিলৈ সকলো চিডব্লিউচি সদস্য, সাংসদ, প্ৰদেশ কংগ্ৰেছ কমিটিৰ (পিচিচি) মুৰব্বী আৰু কংগ্ৰেছ বিধায়িনী দলৰ (চিএলপি) নেতাসকলক প্ৰেৰণ কৰিছে ।
তেলেংগানা কংগ্ৰেছৰ প্ৰাক্তন মুৰব্বী উত্তম কুমাৰ ৰেড্ডীয়ে কয় যে হায়দৰাবাদত চিডব্লিউচিৰ বৈঠক কংগ্ৰেছৰ বাবে ঐতিহাসিক । আনহাতে তেলেংগানাৰ পিচিচি সভাপতি ৰেৱন্ত ৰেড্ডীৰ মতে মানুহে কংগ্ৰেছৰ গ্যেৰাণ্টিত বিশ্বাস কৰে । তেওঁৰ মতে কংগ্ৰেছে চৰকাৰ গঠনৰ প্ৰথম ১০০ দিনৰ ভিতৰত ৬ টা গ্যেৰাণ্টি কাৰ্যকৰী কৰিব । পিচিচি আৰু চিএলপিয়ে গ্যেৰাণ্টি কাৰ্ডৰ ওপৰত আশ্বাস দিব বুলি আশাবাদী নেতাগৰাকী ।
