তেজপুৰ, ১৩ ছেপ্টেম্বৰ: মণিপুৰৰ সামগ্ৰিক পৰিস্থিতি বৰ্তমান পুনৰ স্পৰ্শকাতৰ হৈ পৰিছে ৷ সোমবাৰে কাংপকপি জিলাত সন্দেহজনক উগ্ৰপন্থীৰ হাতত তিনিজন নিৰীহ লোকৰ মৃত্যুৰ পিছত আজি অৰ্থাৎ বুধবাৰে মণিপুৰ বিধানসভাৰ ১৮ জনীয়া এটা সঁজাতী দল নতুন দিল্লীলৈ ৰাওনা হৈছে ৷
এক বিশেষ সূত্ৰমতে জানিব পৰা অনুসৰি মণিপুৰ বিধানসভাৰ দুজন মন্ত্ৰীৰ নেতৃত্বত ১৬ জনীয়া বিধায়কৰ দল বুধবাৰে নতুন দিল্লীলৈ গমন কৰিছে । বিশেষকৈ অশান্ত জৰ্জৰিত মণিপুৰত পুনৰ শান্তি-শৃংখলা ঘূৰাই অনাৰ বাবে কেন্দ্ৰীয় চৰকাৰক হেঁচা প্ৰয়োগ কৰিব ।
সূত্ৰটোৰ মতে মণিপুৰৰ শিক্ষামন্ত্ৰী থৌনাওজাম বসন্ত, সমাজ কল্যাণ মন্ত্ৰী হেইখাম ডিংগো সিঙৰ নেতৃত্বত ১৬ জনীয়া বিধায়কৰ দলে মণিপুৰৰ পৃথক প্ৰশাসনিক বিভাজনৰ বিষয়ে আলোচনা কৰিব ৷ দলটোৱে মণিপুৰৰ মণিপুৰ লেণ্ড ৰেভিনিউ (MLR) আৰু লেণ্ড ৰেভিনিউ (LR) বিষয়তো আলোচনা কৰাৰ সম্ভাৱনা আছে ৷
কাৰণ মণিপুৰৰ এই ভূমি অধিকাৰ আৰু হস্তান্তৰ আইন MLR&LR আইন 1960 সমগ্ৰ ৰাজ্যতে প্ৰযোজ্য বুলি ঘোষণা কৰা হয় যদিও প্ৰকৃততে এই ভূমি আইন সংসদৰ মজিয়াত উত্থাপন কৰা হৈছিল 1959 ত ৷ লগতে এক মাত্ৰ পাহাৰীয়া অঞ্চলত বসবাস কৰা লোকৰ মাজত এয়া প্ৰযোজ্য হ’ব বুলি উল্লেখ কৰা হোৱা নাছিল নাছিল ৷ এই সমগ্ৰ বিষয় সন্দৰ্ভত সঁজাতী দলটোৱে আলোচনা কৰিব বুলি জানিব পৰা গৈছে ৷
আনহাতে যোৱা 12 ঘণ্টাৰ ভিতৰত মণিপুৰৰ ইম্ফল-পশ্চিম, ইম্ফল-পূব, থৌবাল, কাকচিং, বিষ্ণুপুৰ আৰু চুৰাচান্দপুৰ জিলাৰ কিছু এলেকাত নিৰাপত্তাৰক্ষীয়ে অনুসন্ধান চলাই 9 অস্ত্ৰ, 10 জাঁই সক্ৰিয় গুলী, উদ্ধাৰ কৰাৰ লগতে ইম্ফল-পূব আৰু থৌবাল জিলাৰ পৰা 8 টা গুলী আৰু 3 টা বিস্ফোৰক সামগ্ৰী উদ্ধাৰ কৰে বুলি মণিপুৰ আৰক্ষীয়ে জানিবলৈ দিয়ে ।
ইফালে COCOMI য়ে এক প্ৰেছ বিজ্ঞপ্তিৰ জৰিয়তে মণিপুৰৰ ভেলি অঞ্চলত বৰ্তমান সংঘটিত হৈ থকা হিংসা-হত্যা, অশান্তিৰ বাবে পুনৰ AFSPA প্ৰবর্তনৰ দাবী জনায় ৷
