নেশ্যনেল ডেস্ক, 10 ছেপ্টেম্বৰ: জন্ম, মৃত্যু আৰু বিবাহ ক’ত কেতিয়া হ’ব কোনেও নাজানে ৷ এগৰাকী যুৱতীয়ে নিজৰ বিবাহৰ দিনটোৰ বাবে বহুত সপোন ৰচে ৷ এটা শুকুলা ঘোঁৰাত উঠি আহিব প্ৰিয়জন, তেওঁৰ হাতত হাত ধৰি সংগী হ’ব ওৰেটো জীৱনৰ ৷
কিন্তু কেতিয়াবা এনে সপোন ভাঙি চুৰমাৰ হয় ৷ পৰিৱেশ আৰু পৰিস্থিতিয়ে অনুমতি নিদিয়ে আজীৱন প্ৰিয়জনৰ হোৱাৰ ৷ এনদৰেই প্ৰেমৰ বিৰহত দগ্ধ হয় কত কলিজা! তথাপিও এটাই আশা- ‘‘তেওঁ আহিব, মোক নিজৰ কৰিবলৈ’’ ৷
"আজি মোৰ বিয়া, মোক ইয়াৰ পৰা লৈ যোৱা" বিবাহৰ পূৰ্বে এটা মছেজ প্ৰেমিকলৈ, প্ৰেমিকাৰ বিবাহৰ কথা শুনি উধাতু খাই মণ্ডপলৈ আহিল প্ৰেমিক (Bride called lover to stop marriage) ৷ তাৰ পিছতেই সংঘটিত হয় ডাঙৰ ঘটনা ৷ এয়া কোনো বলীউডৰ চিনেমাৰ কাহিনী নহয়, এই ঘটনা হৈছে তামিলনাডুৰ (Marriage hall Ruckus in Chennai) ৷
শুকুৰবাৰে পুৱা চেন্নাইৰ এক বিবাহ ভৱনত অনুষ্ঠিত হৈছিল এক আড়ম্বৰপূৰ্ণ বিবাহৰ অনুষ্ঠান ৷ বিবাহৰ মণ্ডপত কইনা বহিছেহে মাত্ৰ, তেনে সময়তে উপস্থিত হ’ল প্ৰেমিক ৷ দৰাৰ হাতৰ পৰা মংগলসূত্ৰ কাঢ়ি লৈ প্ৰেমিকা কইনাক পিন্ধাবলৈ লওঁতেই প্ৰেমিকাৰ পৰিয়ালৰ লোকে সোধালে মাধমাৰ ৷ লগেলগে বিবাহস্থলী পৰিণত হয় ৰণাংগনলৈ ৷ মুঠতে যিয়েই য’ত পাৰে উধাই-মুধাই প্ৰহাৰ কৰিছে প্ৰেমিকক ৷
এই ঘটনা সহ্য কৰিব নোৱাৰি প্ৰেমিকা কন্যাই বাধা দিয়েহে দিয়ে, কিন্তু কাণসাৰ নকৰে কোনেও ৷ বিয়াত বিঘিনি ঘটাবলৈ অহা যুৱকজনক মাথো প্ৰহাৰ কৰিছে ৷ অৱশেষত এই কথাৰ বিষয়ে অৱগত হৈ বিয়া ঘৰত আৰক্ষী উপস্থিত হৈ পৰিস্থিতি নিয়ন্ত্ৰণ কৰি যুৱকজনক উদ্ধাৰ কৰে ৷
আৰক্ষীয়ে যুৱকজনক সোধ-পোছ কৰাত ওলাই পৰে প্ৰকৃত কথা ৷ যুৱক আৰু কইনাগৰাকীয়ে চেন্নাইৰ এখন বিলাসী হোটেলত একেলগে কৰ্মৰত ৷ তেনেকৈয়ে দুয়োৰে মাজত প্ৰথমে বন্ধুত্ব স্থাপন হয় আৰু তাৰ পিছতেই প্ৰেমৰ সম্পৰ্ক হৈছিল ৷ তেঁওলোকৰ প্ৰেমে লৈছিলেগৈ ঘনিষ্ঠ ৰূপ ৷
ইফালে যুৱতীগৰাকীয়ে এই প্ৰেমৰ কথা ঘৰত ক’বলৈ নৌপাওঁতেই বিবাহৰ পাত্ৰৰ লগত দিন ধাৰ্য কৰিলে ঘৰৰ লোকে ৷ উপায়হীন হৈ ঘৰৰ কথা মানি বিবাহত বহিবলৈ যুৱতীগৰাকী মান্তি হৈছিল যদিও বিবাহৰ দিনা প্ৰেমিকক মেছেজ কৰি বিবাহস্থলীলৈ মাতি পঠিয়ালে যুৱতীগৰকীয়ে ৷
এই বিবাদৰ পাছতে যুৱতীগৰাকীৰ বিবাহ বাতিল হয় ৷ সম্প্ৰতি যুৱকজনক আৰক্ষীৰ জিম্মাত ৰখা হৈছে (Chennai love story)৷
লগতে পঢ়ক:ৰাণী দ্বিতীয় এলিজাবেথৰ মুছৌৰী সংযোগ : জ্যোতিষীৰ পুত্ৰৰ বৃহৎ দাবী
