নেশ্যনেল ডেস্ক,১০ নৱেম্বৰ : তৃণমূলৰ সাংসদ মহুৱা মৈত্ৰক লোকসভাৰ নৈতিকতা সমিতিয়ে নিম্ন সদনৰ পৰা বহিষ্কাৰৰ পৰামৰ্শ দিছে । অৱশ্যে মহুৱা মৈত্ৰই এই পৰামৰ্শক নাকচ কৰি এয়া 'কেংগাৰু আদালতৰ পূৰ্ব নিৰ্ধাৰিত মেচ' বুলি অভিহিত কৰিছে । লগতে ইয়াক ভাৰতত গণতন্ত্ৰৰ অপমৃত্যু বুলিও উদ্বেগ প্ৰকাশ কৰিছে ।
বিজেপি সাংসদ বিনোদ কুমাৰ সোনকাৰৰ নেতৃত্বত গঠিত সমিতিখনে মহুৱা মৈত্ৰৰ ধনৰ বিনিময়ৰ প্ৰশ্ন গোচৰ সন্দৰ্ভত এখন বৈঠক অনুষ্ঠিত কৰে আৰু সমিতিয়ে ৬:৪ সংখ্যাগৰিষ্ঠাৰ সৈতে এই প্ৰস্তাৱ গ্ৰহণ কৰে । সূত্ৰৰ মতে ৪৭৯ পৃষ্ঠাৰ প্ৰতিবেদনত মৈত্ৰক লোকসভাৰ পৰা বহিষ্কাৰ কৰাৰ পৰামৰ্শ দিয়া হৈছিল । এতিয়া নৈতিকতা সমিতিৰ প্ৰতিবেদন সংসদৰ শীতকালীন অধিবেশনত লোকসভাত উত্থাপন কৰা হ'ব আৰু ইয়াৰ সৈতে জড়িত প্ৰস্তাৱটোৰ ওপৰত ভোটগ্ৰহণ কৰা হ'ব । সোনকাৰে সাংবাদিকক কয় যে সমিতিৰ ৬ জনীয়া সদস্যই প্ৰস্তাৱ গ্ৰহণক সমৰ্থন কৰিছে আৰু ৪ জনে ইয়াৰ বিৰোধিতা কৰিছে ।
সমিতিৰ অধ্যক্ষ বিনোদ সোনকাৰে জনোৱা মতে কংগ্ৰেছৰ সাংসদ প্ৰনীত কৌৰকে ধৰি সমিতিখনৰ ৬ জনীয়া সদস্যই প্ৰতিবেদনখন সমৰ্থন কৰিছিল । তেওঁ কয় যে শুকুৰবাৰে লোকসভাৰ অধ্যক্ষ ওম বিৰলাৰ ওচৰত 'বিতং প্ৰতিবেদন' দাখিল কৰিব । সোনকাৰে কোৱা মতে লোকসভাৰ অধ্যক্ষই এই ক্ষেত্ৰত যিকোনো ব্যৱস্থা ল'ব ।
