নেশ্যনেল ডেস্ক,২৯ জুন : কৰ্ণাটক হাতৰ পৰা যোৱাৰ পাছত বিজেপিয়ে বাকী থকা একো সুযোগ এৰি দিব বিচৰা নাই । যাৰ বাবে আগন্তুক বিধানসভা আৰু লোকসভা নিৰ্বাচনৰ পূৰ্বে কেন্দ্ৰীয় গৃহমন্ত্ৰী অমিত শ্বাহ, দলৰ সভাপতি জে পি নাড্ডা আৰু বি এল সন্তোষৰ উপস্থিতিত প্ৰধানমন্ত্ৰীৰ বাসভৱনত প্ৰায় ৫ ঘণ্টা ধৰি গুৰুত্বপূৰ্ণ বৈঠক অনুষ্ঠিত হয় । আগন্তুক নিৰ্বাচনৰ বাবে এই বৈঠক অতি গুৰুত্বপূৰ্ণ হিচাপে বিবেচিত হৈছে ।
দলটোৱে বিশেষ অঞ্চল ভিত্তিক ৰণনীতি প্ৰস্তুত কৰিছে বুলি বিশ্বাস কৰা হয় । দলটোৰ সূত্ৰৰ মতে, সমগ্ৰ দেশক তিনিটা খণ্ডত বিভক্ত কৰা হৈছে: উত্তৰ অঞ্চল, দক্ষিণ অঞ্চল আৰু পূব অঞ্চল । এই বিভাজনৰ উদ্দেশ্য হৈছে দলটোৰ কাম-কাজ সুশৃংখল কৰা আৰু নিৰ্বাচনৰ প্ৰাকমুহূৰ্তত কাৰ্যকৰী সমন্বয় ৰখা । এই পৰিকল্পনাটোত গতিশীলতা আনিবলৈ বিজেপি সভাপতি জে পি নাড্ডা আৰু কেবিনেট মন্ত্ৰীয়ে প্ৰতিটো অঞ্চলৰ বিশিষ্ট নেতাসকলৰ সৈতে কেইবাখনো বৈঠক অনুষ্ঠিত কৰাৰ সময় নিৰ্ধাৰণ কৰিছে ।
প্ৰধানমন্ত্ৰী মোদীৰ পৰামৰ্শ : দলটোৰ সূত্ৰই কোৱা মতে প্ৰধানমন্ত্ৰীয়ে মন্ত্ৰীসকলক সমাজৰ দুখীয়া, প্রান্তিক আৰু সুবিধাৰ পৰা বঞ্চিত শ্ৰেণীৰ কল্যাণক অগ্ৰাধিকাৰ দিবলৈ পৰামৰ্শ দিছে । মন্ত্ৰীসকলক এই গোটবোৰৰ কল্যাণৰ প্ৰতি বিশেষ মনোযোগ দিবলৈ কোৱা হৈছে । তদুপৰি, প্ৰধানমন্ত্ৰীয়ে মন্ত্ৰীসকলক তেওঁলোকৰ সংসদীয় সমষ্টিৰ ভিতৰত পিছপৰা শ্ৰেণীসমূহৰ ওপৰত গুৰুত্ব দিবলৈ আহ্বান জনাইছে ।
পূব অঞ্চলৰ বৈঠক : এই সভাবোৰ ৬, ৭ আৰু ৮ জুলাইত অনুষ্ঠিত হ'ব । প্ৰতিটো দিনে এক নিৰ্দিষ্ট অঞ্চলৰ বাবে ৰখা হ'ব । বিহাৰ, ঝাৰখণ্ড, ওড়িশা, পশ্চিমবংগ, অসম, ছিকিম, অৰুণাচল প্ৰদেশ, নাগালেণ্ড, মণিপুৰ, মিজোৰাম, মেঘালয় আৰু ত্ৰিপুৰা আদি ৰাজ্যৰ ওপৰত গুৰুত্ব দি ৬ জুলাইত গুৱাহাটীত পূব অঞ্চলৰ বৈঠক অনুষ্ঠিত হ'ব ।
উত্তৰ অঞ্চলৰ বৈঠক : ৭ জুলাইত দিল্লীত উত্তৰ অঞ্চলৰ বৈঠক অনুষ্ঠিত হ'ব । য'ত জম্মু-কাশ্মীৰ, লাডাখ, হিমাচল প্ৰদেশ, পাঞ্জাৱ, চণ্ডিগড়, ৰাজস্থান, গুজৰাট, দমন দিউ-দাদৰ নগৰ হাভেলি, মধ্য প্ৰদেশ, ছত্তীশগড়, উত্তৰ প্ৰদেশ, উত্তৰাখণ্ড, দিল্লী আৰু হাৰিয়ানা আদি ৰাজ্য অন্তৰ্ভুক্ত থাকিব ।
দক্ষিণ অঞ্চলৰ বৈঠক : ৮ জুলাইত হায়দৰাবাদত দক্ষিণ অঞ্চলৰ বৈঠক অনুষ্ঠিত হ'ব । কেৰালা, তামিলনাডু, পুডুচেৰী, কৰ্ণাটক, তেলেংগানা, অন্ধ্ৰ প্ৰদেশ, মহাৰাষ্ট্ৰ, মুম্বাই, গোৱা, আন্দামান-নিকোবৰ আৰু লক্ষদ্বীপকে ধৰি এই ৰাজ্যসমূহৰ ওপৰত গুৰুত্ব আৰোপ কৰা হ'ব । বৈঠকত ৰাজ্যৰ ভাৰপ্ৰাপ্ত বিষয়া, ৰাজ্যিক সভাপতি, সংগঠন মন্ত্ৰী, মুখ্যমন্ত্ৰী, উপ মুখ্যমন্ত্ৰী, সাংসদ, বিধান সভাৰ সদস্য আৰু ৰাষ্ট্ৰীয় কাৰ্যনিৰ্বাহকৰ সদস্যসকলৰ দৰে বিভিন্ন গুৰুত্বপূৰ্ণ ব্যক্তিয়ে অংশগ্ৰহণ কৰিব ।
এই বৈঠকবোৰত আঞ্চলিক বিষয়, ৰণনীতিৰ প্ৰস্তুতি আৰু প্ৰতিটো অঞ্চলত দলৰ কাৰ্যবাহী শক্তিশালী কৰাৰ বাবে গুৰুত্বপূৰ্ণ মঞ্চ হিচাপে কাম কৰিব বুলি আশা কৰা হৈছে । আগন্তুক নিৰ্বাচনৰ বাবে বিজেপি অধিক সতৰ্ক হৈ পৰিকল্পনা আৰু প্ৰস্তুতি আগবঢ়াইছে ।
উল্লেখ্য যে ২০২৪ চনৰ লোকসভা নিৰ্বাচনৰ ৰণনীতিৰ ওপৰত বিস্তৃত আলোচনাৰ বাবে প্ৰধানমন্ত্ৰী মোদীৰ বাসভৱনত বিজেপিৰ জ্যেষ্ঠ নেতাসকলে প্ৰায় ৫ ঘণ্টা ধৰি বৈঠকত বহে । বৈঠকখনত গৃহমন্ত্ৰী অমিত শ্বাহ, বিজেপি সভাপতি জে পি নাড্ডা আৰু বিজেপিৰ সাধাৰণ সম্পাদক (সংগঠন) বি এল সন্তোষৰ দৰে বিশিষ্ট নেতাসকল উপস্থিত থাকে । বৈঠকৰ ফলাফল এতিয়ালৈ প্ৰকাশ কৰা হোৱা নাই যদিও সূত্ৰৰ মতে দলৰ ভিতৰত এক বৃহৎ সালসলনিৰ ইংগিত দিছে ।
লগতে পঢ়ক :Smriti to Rahul: ৰাহুল গান্ধীৰ দেশপ্ৰেমক লৈ প্ৰশ্ন স্মৃতি ইৰাণীৰ
