নিউজ ডেস্ক, ৩ মে' : কোভিড-১৯ৰ ফলত জাৰী কৰা লকডাউনে দেশৰ পৰ্যটন ক্ষেত্ৰত বেয়াকৈ প্ৰভাৱ পেলাইছে । বহু কোটি কোটি টকাৰ ৰাজহ হেৰুৱাবলগীয়া হৈছে ৰাজ্যিক তথা কেন্দ্ৰীয় পৰ্যটন বিভাগে ।
লকডাউনৰ মাজতে জম্মু-কাশ্মীৰৰ চানাচাৰস্থিত টিউলিপ গাৰ্ডেনত ৰঙা, হালধীয়া, বগা আদি মনোমোহা ৰঙেৰে সম্বৃদ্ধ টিউটিপসমূহ ফুলি উঠিছে । উধমপুৰত অৱস্থিত চানাচাৰ বেল্ট টিউলিপ বাগিছাৰ বাবে প্ৰখ্যাত আৰু বৰ্তমান সময়ত এই অঞ্চললৈ বহু পৰ্যটকৰ আগমণ ঘটে । কিন্তু এইবাৰ লকডাউনৰ ফলত টিউলিপৰ সৌন্দৰ্য উপভোগ কৰিবলৈ কোনো নাই । যাৰ বাবে এতিয়া একপ্ৰকাৰ উদং হৈ ৰৈছে টিউলিপ বাগিছাসমূহ ।
জম্মু-কাশ্মীৰৰ অন্যতম পৰ্যটক খণ্ডসমূহৰ ভিতৰত চানাচাৰৰ বিশেষ ভূমিকা আছে । উধমপুৰৰ পৰা জম্মুলৈ বিয়পি থকা এই চানাচাৰ বেল্টৰ সকলো লোক একমাত্ৰ পৰ্যটন খণ্ডৰ ওপৰতে নিৰ্ভৰশীল । যাৰ ফলত এইবাৰ লকডাউনৰ বাবে এইসকল লোকে বিশেষ অসুবিধাৰ সন্মুখীন হোৱাও পৰিলক্ষিত হৈছে ।
