ইণ্টাৰনেশ্যনেল ডেস্ক, 18 ছেপ্তেম্বৰ: মাৰ্কিন ৰাষ্ট্ৰপতি ড'নাল্ড ট্ৰাম্পে প্ৰধানমন্ত্ৰী নৰেন্দ্ৰ মোডীক তেওঁৰ 70 তম জন্মদিনত "মহান নেতা আৰু বিশ্বাসী বন্ধু" বুলি প্ৰসংশা কৰে ৷ 1950 চনৰ 17 ছেপ্তেম্বৰত জন্মগ্ৰহণ কৰা প্ৰধানমন্ত্ৰী নৰেন্দ্ৰ মোডীৰ বৃহস্পতিবাৰে 70 তম জন্মদিন আছিল ৷
"মই ভাৰতৰ প্ৰধানমন্ত্ৰী @narendramodi ক তেওঁৰ 70 তম জন্মদিনৰ শুভেচ্ছা জ্ঞাপন কৰিছো ৷ এগৰাকী মহান নেতা আৰু বিশ্বাসী বন্ধু গৰাকীলৈ বহুত বহু শুভকামনা ৷" ট্ৰাম্পে বৃহস্পতিবাৰে দুপৰীয়া তেওঁলোকৰ স্থানীয় সময় অনুসৰি টুইটযোগে তেওঁক শুভেচ্ছা জ্ঞাপন কৰে ৷
ট্ৰাম্পে 'নমস্তে ট্ৰাম্প' অনুষ্ঠানত মোডীৰ সৈতে তেওঁ আৰু তেওঁৰ পত্নী তথা ফাৰ্ষ্ট লেডী মেলানিয়াই উঠা এখন ফটও প'ষ্ট কৰে ৷
মোডী আৰু ট্ৰাম্পে এক বিশেষ সম্বন্ধৰে সৈতে বহু আঞ্চলিক আৰু বৈশ্বিক ক্ষেত্ৰত কাম কৰি আছে ৷ তেওঁলোকে প্ৰায়েই ফোনযোগে পৰস্পৰৰ সৈতে যোগাযোগ ৰাখে আৰু দুয়োখন দেশে কৰ'ণা মহামাৰীৰ প্ৰাদুৰ্ভাৱৰ সময়ছোৱাত অভূতপূৰ্ব সহযোগিতা আগবঢ়াইছে ৷
ভাৰতে মহামাৰীৰ প্ৰাদুৰ্ভাৱৰ প্ৰথমছোৱা সময়ত আমেৰিকালৈ হাইড্ৰ'ক্সিক্ল'ৰোকুইন সৰবৰাহ কৰাৰ লগতে, আমেৰিকাইয়ো ভাৰতৰ বাবে ভেণ্টিলেটৰ অৰ্ডাৰ কৰে ৷ দুয়ো দেশে ভেকচিন আৰু চিকিৎসা উন্নয়ৰ ক্ষেত্ৰতো সহযোগিতা প্ৰদান কৰিছে ৷
