নেশ্বনেল ডেস্ক, 3 ডিচেম্বৰঃ মঙলবাৰে কেন্দ্ৰীয় গৃহ মন্ত্ৰালয়ে জম্মু-কাশ্মীৰ সন্দৰ্ভত লোকসভাত এক বিজ্ঞপ্তি প্ৰদান কৰে ৷ কেন্দ্ৰীয় গৃহ মন্ত্ৰালয়ৰ বিজ্ঞপ্তি অনুসৰি, আগষ্ট মাহৰ 5 তাৰিখত অনুচ্ছেদ 370 প্ৰত্যাহাৰ কৰাৰ পিচৰে পৰাই জম্মু-কাশ্মীৰত হ্ৰাস পাইছে সন্ত্ৰাসজনিত ঘটনা ৷ অৱশ্যে বিজ্ঞপ্তিটোত নিয়ন্ত্ৰণৰেখাৰ সিপাৰৰ পৰা ক্ৰমাগত হাৰে অবৈধ অনুপ্ৰেৱশৰ ঘটনা এতিয়াও সংঘটিত হৈ আছে বুলি উল্লেখ কৰে কেন্দ্ৰীয় গৃহ মন্ত্ৰালয়ে ৷
মঙলবাৰে লোকসভাত এই সন্দৰ্ভত বিজ্ঞপ্তি প্ৰদান কৰে কেন্দ্ৰীয় গৃহ মন্ত্ৰালয়ে ৷ বিজ্ঞপ্তিটোত চলিত বৰ্ষৰ আগষ্ট মাহৰ 5 তাৰিখৰ পৰা 27 নৱেম্বৰ তাৰিখলৈ 88টা আক্ৰমণ আৰু অনুপ্ৰৱেশৰ ঘটনা সংঘটিত হৈছে ৷ চলিত বৰ্ষৰ 12 এপ্ৰিলৰ পৰা 4 আগষ্টলৈ 106টা অনুৰূপ ঘটনা সংঘটিত হৈছিল জম্মু-কাশ্মীৰত ৷ নিম্ন সদনৰ এক প্ৰশ্নৰ উত্তৰত এই তথ্য প্ৰদান কৰে কেন্দ্ৰীয় গৃহ মন্ত্ৰালয়ে ৷ আনহাতে চলিত বৰ্ষৰ 5 আগষ্টৰ পৰা 31 অক্টোবৰলৈ মুঠ 88 দিনত নিয়ন্ত্ৰণৰেখাৰ সীপাৰৰ পৰা 84টা ঘটনা সংঘটিত হোৱাৰ বিপৰীতে, 9 মে'ৰ পৰা 4 আগষ্টলৈ মাত্ৰ 53টা অনুৰূপ ঘটনা সংঘটিত হৈছিল ৷
