নিউজ ডেস্ক, 2 জুনঃ বৈদ্যুতিক,তথ্য প্ৰযুক্তি আৰু যোগাযোগ মন্ত্ৰী ৰবি শংকৰ প্ৰসাদে সোমবাৰে ঘোষণা কৰে তিনিখন নতুন আঁচনিৰ কথা । সংবাদ মাধ্যমক সম্বোধন কৰাৰ সময়ত মন্ত্ৰীগৰাকীয়ে এই আঁচনিৰ কথা ঘোষণা কৰে । বৈদ্যুতিক সামগ্ৰীৰ উৎপাদন ক্ষীপ্ৰ কৰাৰ উদ্দেশ্যেৰে এই আঁচনি কেইখন হাতত লোৱা হৈছে ।
এই আঁচনি কেইখন হৈছে- উৎপাদন লিংকযুক্ত ইনচেন্টিভ আঁচনি,উপাদান নিৰ্মাণ আঁচনি আৰু ক্লাষ্টাৰ আঁচনি ।
উৎপাদন লিংকযুক্ত ইনচেন্টিভ আঁচনিয়ে উৎপাদক সকলক আগ্ৰহী কৰিব আনহাতে উপাদান নিৰ্মাণ আঁচনিয়ে বৈদ্যুতিক সামগ্ৰী অধিক পৰিমাণে নিৰ্মাণ কৰাত সহায় কৰিব । উপাদান নিৰ্মাণ আঁচনি আৰু ক্লাষ্টাৰ আঁচনি প্ৰধানকৈ বৈদ্যুতিক সামগ্ৰী উৎপাদন আৰু এই উদ্যোগৰ বিকাশেৰ বাবেই প্ৰধানকৈ গ্ৰহণ কৰা হৈছে ।
মন্ত্ৰী গৰাকীয়ে কয় যে, 2014 চনত ভাৰতত বৈদ্যুতিক সামগ্ৰীৰ উৎপাদনৰ মুল্য আছিল 1,90,366 কোটি টকা,আনহাতে বৰ্তমান ইয়াৰ পৰিমাণ 4,50,000 কোটি টকালৈ বৃদ্ধি হৈছে । আনহাতে গোলকীয় বজাৰত 2012 চনত ভাৰতীয় বৈদ্যুতিক সামগ্ৰীৰ অংশীদাৰিত্ব আছিল 1.3 শতাংশ । 2018 চনত ইয়াৰ পৰিমাণ বৃদ্ধি হৈ 3 শতাংশ হৈছে ।
