নিউজ ডেস্ক, 8 এপ্ৰিল : লোকসভা নিৰ্বাচনৰ প্ৰাকমুহূৰ্তত হায়দৰাবাদত জব্দ 8 কোটি টকা ৷ হয়দৰাবাদৰ পৰা আৰক্ষীয়ে সোমবাৰে জব্দ কৰে এই বৃহৎ পৰিমাণৰ ধনখিনি ৷ আগন্তুক 11 এপ্ৰিলত ৰাজ্যখনত হ'বলগীয়া লোকসভা নিৰ্বাচনত ভোটৰ ক্ৰয়-বিক্ৰয়ৰ বাবে অনা হৈছিল বৃহৎ ধনখিনি ৷
তেলেংগানাৰ সৰ্ববৃহৎ জেৰা হিচাপে পৰিচিত হোৱা এই জেৰা চলোৱা হৈছিল হায়দৰাবাদৰ নাৰায়নগুণ্ডা অঞ্চলত ৷ বিশেষ সূত্ৰযোগে আৰক্ষীয়ে গোপন ধনৰ সম্ভেদ লাভ কৰাৰ পাচতেই এখন চাৰিচকীয়া বাহনৰ পৰা উদ্ধাৰ হয় 2 কোটি টকা ৷ বাহনখনত ধনৰ সৈতে ধৰা পৰা লোকদুজনক সোধ-পোছ কৰাৰ অন্ততেই এটা বেংকৰ সমীপৰ পৰা আৰক্ষীয়ে জব্দ কৰিবলৈ সক্ষম হয় 5 কোটিকৈ ধন ৷ এই ধনৰ লগতে আৰক্ষীৰ হাতত আটক হয় পাঁচজনকৈ লোক ৷ উল্লেখ্য যে বিগত তিনিদিনত হায়দৰাবাদ চহৰৰ পৰা মুঠ 13 কোটি টকা উদ্ধাৰ কৰিবলৈ সক্ষম হৈছে আৰক্ষীয়ে ৷ সমগ্ৰ ৰাজ্যখনতে বৰ্তমানলৈ উদ্ধাৰ হোৱা ধনৰ পৰিমাণ 26.73 কোটি বুলি জানিবলৈ দিয়ে হায়দৰাবাদ আৰক্ষী আয়ুক্ত অঞ্জনী কুমাৰে ৷ উদ্ধাৰ হোৱা ধনৰ পৰিমাণ ৰাজ্যখনৰ ইতিহাসত বৰ্তমানলৈ সৰ্বাধিক বুলিও সদৰী কৰে আৰক্ষী আয়ুক্তগৰাকীয়ে ৷ তেলেংগানাৰ 17 খন লোকসভা আসনত আগন্তুক 11 এপ্ৰিলত অনুষ্ঠিত হ'ব লোকসভা নিৰ্বাচন ৷
