নেশ্বনেল ডেস্ক,10 ছেপ্তেম্বৰ : চন্দ্ৰযান-2 ৰ বিষয়ে বৰ্তমানেও সৰ্বত্ৰে আলোচনা হৈ থকাৰ সময়তে ইছৰো'ৱে আৰম্ভ কৰিছে পৰৱৰ্তী প্ৰকল্প গগনায়নৰ প্ৰস্তুতি ৷ ভাৰতীয় বায়ু সেনাত কৰ্মৰত উৰিষ্যাৰ বালাংগীৰ জিলাৰ নিবাসী উইং কমাণ্ডাৰ নিখিল ৰথক ইছৰো'ৰ প্ৰাৰম্ভিক পৰ্যায়ৰ বাছনি তালিকাৰ বাবে নিৰ্বাচিত কৰা হৈছে ৷ উল্লেখ্য যে, এই প্ৰকল্প হৈছে ইছৰো'ৰ প্ৰথমটো মানৱ অন্তৰীক্ষ অভিযান গগনায়ন ৷ 2022 চনত আয়োজন কৰা এই অন্তৰীক্ষ অভিযানত তিনি গৰাকীকৈ মহাকাশযাত্ৰীৰে অভিযান চলোৱা হ'ব ৷
উল্লেখ্য যে, নিখিল ৰথে 1998 চনত কেন্দ্ৰীয় বিদ্যালয়ৰ পৰা স্কুলীয়া শিক্ষা সামৰাৰ পাছতে 2000 চনত দিল্লী পাব্লিক স্কুলৰ পৰা দ্বাদশ শ্ৰেণীত উত্তীৰ্ণ হয় ৷ ইয়াৰ পাছতে হিন্দু কলেজত স্নাতক মহলাত অধ্যয়ন কৰি থকাৰ সময়তে ৰাষ্ট্ৰীয় প্ৰতিৰক্ষা একাডেমীলৈ (NDA) নিৰ্বাচিত হৈছিল ৷ 2003 চনত তেওঁ ভাৰতীয় বায়ু সেনাত যোগদান কৰে ৷ প্ৰখ্যাত অধিবক্তা আৰু বালাংগীৰ জিলাৰ বিশিষ্ট ব্যক্তি হিচাপে পৰিচিত নিখিল ৰথৰ পিতৃয়ে এই সম্পৰ্কত মন্তব্য কৰে যে, এয়া গৌৰৱৰ বিষয় ৷ তেওঁ এজন কঠোৰ পৰিশ্ৰমী ব্যক্তি বুলিও মন্তব্য কৰে গৌৰৱাম্বিত পিতৃ গৰাকীয়ে ৷ নিখিল ৰথৰ মাতৃয়েও তেওঁ চূড়ান্ত পৰ্যায়লৈ নিৰ্বাচিত হ'ব বুলি আশা প্ৰকাশ কৰে ৷
