নিউজ ডেস্ক, 21 জুলাইঃ চলিত বৰ্ষত স্থবিৰ হৈ পৰিল কেদাৰনাথ মন্দিৰৰ ৰুদ্ৰ ধ্যান গুহাৰ বুকিং প্ৰক্ৰিয়া ৷ বিশ্বজুৰি ত্ৰাস সৃষ্টি কৰা মহামাৰী কৰ'ণা সংকটৰ বাবেই স্থগিত ৰখা হয় বুকিং ৷ বিগত বৰ্ষত প্ৰধানমন্ত্ৰী নৰেন্দ্ৰ মোডীয়ে ধ্যন কৰিছিল উক্ত গুহাটোত ৷ যাৰ বাবে এই গুহাটোক 'মোডী গুহা' হিচাপেও নামাকৰণ কৰিছিল একাংশ ভক্তই ৷
তথ্য অনুসৰি, মহামাৰী কৰ'ণা সংকটৰ মাজতে 1 জুলাইৰ পৰা আৰম্ভ হোৱা ছাৰধাম যাত্ৰাত বৰ্তমানলৈকে প্ৰায় 25 হাজাৰ ভক্তই কেদাৰনাথ মন্দিৰৰ যাত্ৰা কৰে ৷ কিন্তু কোনো ভক্তই ধ্যানৰ বাবে বুকিং কৰা নাই গুহাটো ৷
আনহাতে, ইটিভি ভাৰতৰ সৈতে হোৱা বাৰ্তালাপত গড়ৱাল মণ্ডল বিকাশ নিগমৰ নিৰ্দেশকে ইভা আশীষ শ্ৰীবাস্তৱে মহামাৰী কৰ'ণা সংকটৰ বাবেই গুহাৰ বুকিং প্ৰক্ৰিয়া স্থগিত ৰখা হয় বুলি মত প্ৰকাশ কৰে ৷ লগতে কয় যে, বিগত বৰ্ষৰ জুন মাহৰ পৰাই এই গুহাটো দৰ্শনাৰ্থীৰ বাবে মুকলি কৰা হৈছিল ৷ জুনৰ পৰা অক্টোবৰ মাহ পৰ্যন্ত এই গুহাটোত প্ৰায় 1 লাখ 50 হাজাৰ টকা ৰাজহ আদায় হয় ৷ প্ৰধানমন্ত্ৰী নৰেন্দ্ৰ মোডীয়ে এই গুহাটোত ধ্যান কৰাৰ পৰাই পৰ্যটকৰ আকৰ্ষণৰ কেন্দ্ৰবিন্দু হৈ পৰিছিল গুহাটো ৷ কিন্তু চলিত বৰ্ষত ত্ৰাস সৃষ্টি কৰা মহামাৰী কৰ'ণাৰ বাবেই এই পৰ্যন্ত গুহাটো কোনো পৰ্যটকে বুকিং কৰা নাই ৷
আৰু পঢ়কঃ স্বচ্ছ সৰ্বেক্ষণ 2020ঃ প্ৰধানমন্ত্ৰী মোডীৰ সমষ্টি বাৰাণসীয়ে লাভ কৰিলে "বেষ্ট গংগা টাউন এৱাৰ্ড"
