নেশ্বনেল ডেস্ক, 5 জানুৱাৰীঃ দেওবাৰে কংগ্ৰেছ-শিৱসেনা-এনচিপি মিত্ৰজোঁটৰ উদ্ধৱ থাকৰে নেতৃত্বাধীন মহাৰাষ্ট্ৰ চৰকাৰৰ মন্ত্ৰীসভাৰ দপ্তৰ বিতৰণ ৷ বিত্তমন্ত্ৰী, গৃহমন্ত্ৰী আৰু ৰাজহমন্ত্ৰীৰ দৰে গুৰুত্বপূৰ্ণ বিভাগৰ দায়িত্বসমূহ প্ৰদান কৰা হয় ৷ মহাৰাষ্ট্ৰৰ নৱনিৰ্বাচিত মুখ্যমন্ত্ৰী উদ্ধৱ থাকৰেৰ পৰামৰ্শৰ ভিত্তিত বিতৰণ কৰা মন্ত্ৰীত্বৰ তালিকা ৰাজ্যপাল ভগত সিং কোচিয়াৰীলৈ অনুমোদনৰ বাবে প্ৰেৰণ কৰা হয় ৷
মন্ত্ৰীত্ব বিতৰণৰ তালিকা অনুসৰি, উপ-মুখ্যমন্ত্ৰী হিচাপে দায়িত্বভাৰ গ্ৰহণ কৰা এনচিপিৰ অজিত পাৱাৰে বিত্ত আৰু পৰিকল্পনা বিভাগৰো দায়িত্ব গ্ৰহণ কৰিব ৷ অনিল দেশমুখে গৃহবিভাগ, জয়ন্ত পাটিলে জলসম্পদ বিভাগ, চগন ভূজবালে খাদ্য আৰু যোগান বিভাগ আৰু নৱাব মালিকক সংখ্যালঘু উন্নয়ন বিভাগ প্ৰদান কৰা হৈছে ৷ কংগ্ৰেছৰ বালাচাহেব থোৰাটক ৰাজহ বিভাগ, অশোক চৱনক সমাজ কল্যান বিভাগ আৰু বৰ্ষা গাইকৱাডক শিক্ষা বিভাগ প্ৰদান কৰা হৈছে ৷ শিৱসেনাৰ নেতাসকলৰ ভিতৰত আদিত্য থাকৰেক পৰিৱেশ আৰু পৰ্যটন বিভাগৰ দায়িত্ব অৰ্পন কৰা হৈছে ৷ একনাথ সিন্ধে নগৰ উন্নয়ন বিভাগ, উদ্যোগ আৰু খনন বিভাগ, সুভাষ দেশাইয়ে মাৰাঠী ভাষা বিভাগ আৰু অনিল পৰৱেই পৰিৱহণ বিভাগৰ দায়িত্ব গ্ৰহণ কৰিব ৷ সঞ্জয় ৰাথোড়ক বন বিভাগ আৰু উদয় সামন্তক উচ্চ আৰু কাৰিকৰী শিক্ষা বিভাগ প্ৰদান কৰা হৈছে ৷ দাদা ভূছেক কৃষি বিভাগ, সন্দীপন ভূমৰেক সংস্থাপন বিভাগ, গোলাবৰাও পাটিলক পানী যোগান আৰু শংকাৰাও গাদাখক জলসিঞ্চন বিভাগৰ দায়িত্ব অৰ্পন কৰা হৈছে ৷
উল্লেখ্য যে, বহু জল্পনা-কল্পনা আৰু বিবাদৰ অন্তত কংগ্ৰেছ-শিৱসেনা-এনচিপিৰ মিত্ৰজোঁটত মহাৰাষ্ট্ৰ চৰকাৰ গঠন হৈছিল ৷ 28 নৱেম্বৰত উদ্ধৱ থাকৰেই মুখ্যমন্ত্ৰী হিচাপে শপত গ্ৰহণ কৰিছিল ৷ তেওঁৰ উপৰিও এনচিপি, কংগ্ৰেছ আৰু শিৱসেনাৰ মুঠ 6 জন মন্ত্ৰীয়েও শপত গ্ৰহণ কৰিছিল ৷ আনহাতে, 30 ডিচেম্বৰত তিনিওটা মিত্ৰজোঁটৰ দলৰ অজিত পাৱাৰ আৰু আদিত্য থাকৰেৰ সহিতে 36 জনকৈ নেতাই মন্ত্ৰী হিচাপে শপত গ্ৰহণ কৰিছিল ৷
আৰু পঢ়ক : পেৰিছত প্ৰৱাসী ভাৰতীয়ৰ CAA বিৰোধী প্ৰতিবাদ
