নেশ্বনেল ডেস্ক, 9 আগষ্ট : যোৱা বুধবাৰৰ পৰা তামিলনাডুৰ কইম্বাটোৰ আৰু নিলগিৰিছ জিলাত হোৱা প্ৰচুৰ বৃষ্টিপাতৰ ফলত বানৰ সৃষ্টি হৈছে ৰাজ্যখনত ৷ জিলা দুখনৰ উপায়ুক্তই বানপানীৰ ফলত শুকুৰবাৰে বিদ্যালয় আৰু কলেজসমূহ বন্ধ ঘোষণা কৰে ৷ ভাৰতীয় বতৰবিজ্ঞান কেন্দ্ৰই প্ৰদান কৰা তথ্য অনুসৰি, নিলগিৰিছ জিলাই যোৱা 48 ঘন্টাত সৰ্বাধিক বৰষুণৰ অভিলেখ গঢ়িছে ৷ উল্লেখ্য যে, এই ধাৰাষাৰ বৰষুণৰ পাছত তামিলনাডুৰ নদীসমূহৰ বান্ধৰ ওপৰেদি পানীৰ সোঁত বৈ আহিছে ৷ ইয়াৰোপৰি, জিলা দুখনত অহা দুদিনলৈ প্ৰচুৰ বৃষ্টিপাতৰ সম্ভাৱনা ব্যক্ত কৰা হৈছে ৷
ধাৰাষাৰ বৃষ্টিপাতৰ ফলত বানত বুৰ গ'ল তামিলনাডু
তামিলনাডুৰ উপৰি কেৰালাৰ কান্নৌৰ, ইদ্দুকী, মালাপুৰম জিলা আৰু কৰ্ণাটকৰ ইডুপী, উত্তৰা কানাড়া আৰু দক্ষিণা কানাড়া জিলা ভয়াৱহভাৱে বানৰ কবলত পৰিছে ৷ শতাধিক লোক বানৰ ফলত ক্ষতিগ্ৰস্ত হোৱাৰ লগতে হাজাৰোধিক লোকক বান শিবিৰলৈ প্ৰেৰণ কৰা হৈছে ৷
