নিউজ ডেস্ক, ২৫ এপ্ৰিলঃ শনিবাৰৰ পৰা আৰম্ভ হৈছে ইছলাম ধৰ্মালম্বীৰ পৱিত্ৰ মাহ ৰমজান । যাৰ বাবে লক ডাউন আৰু কৰ'ণা ভাইৰাছৰ ভয়াৱহতাৰ প্ৰতি লক্ষ্য ৰাখিয়ে সম্ভাৱ্য ভিৰৰ অনুমান কৰি মুম্বাইত ড্ৰ'ণেৰে নিৰীক্ষণৰ ব্যৱস্থা হাতত লৈছে মুম্বাই আৰক্ষী-প্ৰশাসনে ।
এই সন্দৰ্ভত মুম্বাই আৰক্ষীৰ মুখপাত্ৰ প্ৰণয় আশোকে কয়,আশাৰ অনুৰূপ মুছলমান সকলক "চেহৰী" বা "ইফতাৰ" ক্ৰয় কৰাৰ বাবে কোনো ধৰণৰ বিশেষ ৰেহাই দিয়া নহয় । লক ডাউনৰ মাজত কোনো ধৰণৰ বিশেষ ৰেহাইৰ অনুমতি প্ৰদান কৰা হোৱা নাই ।
ইয়াৰ পূৰ্বে আৰক্ষী-জ'ন ১ ৰ উপ মহাধ্যক্ষ সংগ্ৰামসিং নিশান্দাৰ কৈছিল যে,ৰমজানৰ সময়ত সকলো যাৱতীয় সুৰক্ষা ব্যৱস্থাৰ বাবে সাজু হৈ আছে মুম্বাই আৰক্ষী ।
সকলো মুলছমান লোককে সামাজিক দুৰত্ব মানি চলিবলৈ আহ্বান কৰা হৈছে । কোনো ধৰণৰ ভিৰ মছজিদ,বিল্ডিঙত অথবা ঘৰৰ মূধছত কৰাৰ নিষেধাজ্ঞা প্ৰদান কৰিছে আৰক্ষীয়ে । ড্ৰ'ণেৰে সকলোৰে ওপৰত নিৰীক্ষণৰ ব্যৱস্থা হাতত লৈছে মুম্বাই আৰক্ষীয়ে । এই নিয়ম উলংঘা কৰাসকলৰ ওপৰত বিহিত ব্যৱস্থা গ্ৰহণৰো কথা উল্লেখ কৰিছে মুম্বাই আৰক্ষীৰ বিষয়াজনে । ইয়াৰ লগতে আশ্বাস প্ৰদান কৰি কৈ যে,আৰক্ষী,বেচৰকাৰী সংস্থাৰ সহযোগিতাত COVID-১৯ সম্ভাৱ্য অঞ্চল সমূহত মুছলিম লোকসকলক প্ৰয়োজনীয় সকলো সামগ্ৰী যোগান ধৰা হ'ব ।
আনহাতে আজান দিয়াৰ অনুমতি দিয়া হৈছে মছজিদ কৰ্তপক্ষক । কিন্তু নামাজৰ বাবে কোনো ধৰণৰ জন সমাগমৰ অনুমতি প্ৰদান কৰা হোৱা নাই । প্ৰত্যেক বাৰেই ৰমজানৰ সময়ত জাক-জমকতাৰে ভৰি পৰে মুম্বাইৰ অলি-গলি । কিন্তু এইবাৰ কৰ'ণা ভাইৰাছৰ বাবেই এক ব্যতিক্ৰম দৃশ্য দেখা পোৱা গৈছে মায়াৱী নগৰখনত ।
