নিউজ ডেস্ক, ২৪ এপ্ৰিলঃ নৰ্থ দিল্লীত প্ৰশাসনে ছীল কৰিলে এখন চৰকাৰীখণ্ডৰ হাস্পতাল । বাবু জগজীৱন ৰাম মেমৰিয়েল হাস্পতাল ৰ ১৪ গৰাকীকৈ ষ্টাফ সদস্যৰ দেহত COVID-১৯ৰ অৱস্থিতি ধৰা পৰাৰ পাচতেই ছীল কৰা হয় হাস্পতালখন । বৃহস্পতিবাৰে COVID-১৯ৰ পৰীক্ষা কৰাৰ পাচতেই লোক কেইজনৰ দেহত কৰ'ণা ভাইৰাছৰ অৱস্থিতিৰ কথা পোহৰলৈ আহে। এই আক্ৰান্ত কৰ্মী সকলৰ ভিতৰত উচ্চ পৰ্যায়ৰ বিষয়াও অন্তৰ্ভুক্ত হৈ আছে ।
১০০ টা বিচনা যুক্ত সকলো সুবিধাৰে পৰিপূৰ্ণ এই চৰকাৰী জিলা হাস্পতালখন ই-ব্লক জাহানগিৰপুৰ নৰ্থ-ৱেষ্ট জিলাত অৱস্থিত । সংক্ৰমণ ৰোধ কৰাৰ বাবেই প্ৰশাসনে ততাতৈয়াকৈ হাস্পতালখন ছীল কৰি দিয়ে। স্বাস্থ্য় বিভাগৰ মতে,দিল্লীত বৰ্তমানলৈকে ২৩৭৬ জন লোক COVID-১৯ ৰ আক্ৰান্ত হোৱাৰ বিপৰীতে ৫০ জন লোকৰ মৃত্যু হৈছে । আনহাতে ৮০৮ জন লোক আৰোগ্য হ'বলৈ সক্ষম হৈছে ।
