নেশ্যনেল ডেস্ক, 14 ডিচেম্বৰ: শুকুৰবাৰে পশ্চিম বংগৰ বিজেপি প্ৰধান দিলীপ ঘোষে কয় যে, নাগৰিকত্ব সংশোধনী আইন পশ্চিম বংগত বলবৎ কৰা হ'ব ৷ এই ক্ষেত্ৰত পশ্চিম বংগৰ মুখ্যমন্ত্ৰী মমতা বেনাৰ্জী বা তৃণমূল কংগ্ৰেছ দলে কোনো পদক্ষেপ ল'ব নোৱাৰে ৷ এই আইন বলবৎ হোৱাৰ ক্ষেত্ৰত পশ্চিম বংগই হ'ব প্ৰথমখন ৰাজ্য ৷
'ইয়াৰ পূৰ্বেও মমতা বেনাৰ্জীয়ে 370 ধাৰা আৰু বিমুদ্ৰাকৰণৰো বিৰোধিতা কৰিছিল, কিন্তু কেন্দ্ৰ চৰকাৰক তেওঁ ৰখাব নোৱাৰিলে ৷ এইবাৰো ৰাজ্যখনত নাগৰিকত্ব সংশোধনী আইন বলবৎ কৰা হ'ব' বুলি কয় বিজেপি প্ৰধান গৰাকীয়ে ৷
মমতা বেনাৰ্জীয়ে অনুপ্ৰৱেশকাৰী সকলক লৈ চিন্তিত, কিন্তু সেই হিন্দু শৰনাৰ্থী সকলৰ প্ৰতি নহয় যিসকলে যোৱা বহু দশকৰ পৰাই এই আইনখনৰ অপেক্ষাত আছিল ৷
বিজেপিৰ ৰাষ্ট্ৰীয় সাধাৰণ সম্পাদক কৈলাশ বিজয়ৱাৰ্গিয়ায়ো এই আইনৰ বিষয়ে মমতা বেনাৰ্জীয়ে ৰাইজক ভূল তথ্য দিয়া বুলি সমালোচনা কৰে ৷ তেওঁ কয়, মমতা বেনাৰ্জীয়ে কিয় পশ্চিম বংগৰ প্ৰতিবাদৰ আঁৰত থকা অনুপ্ৰৱেশকাৰী সকলৰ বিৰুদ্ধে ব্যৱস্থা নলয়? তেওঁ জনতাক আইন হাতত তুলি লোৱাৰ দিশে প্ৰৰোচিত কৰি আছে ৷ যদি তেওঁ অনুপ্ৰৱেশকাৰী সকলৰ বাবে চিন্তিত, তেন্তে হিন্দু শৰনাৰ্থী সকলৰ বাবে তেওঁ কিয় চিন্তিত নহয়?
উল্লেখ্য যে, নাগৰিকত্ব সংশোধনী আইন বাতিলৰ দাবীত শুকুৰবাৰে একাংশ প্ৰতিবাদকাৰীয়ে বিভিন্ন হিংসাত্মক পদক্ষেপ লয় ৷ ৰে'লৱে ষ্টেচনত অগ্নকাণ্ডৰ ঘটনাও সংঘটিত কৰে আন্দোলনকাৰী সকলে ৷
আৰক্ষীৰ সূত্ৰ অনুসৰি মুৰ্ছিদাবাদ, বীৰভূম, বৰ্দৱান উত্তৰ বংগ, হাওৰা আদিৰ কিছু ঠাইত ৰাইজে আদি পুৱা নৰেন্দ্ৰ মোদী নেতৃত্বাধীন চৰকাৰৰ বিৰুদ্ধে ৰাজপথলৈ ওলাই আহি প্ৰতিবাদ সাব্যস্ত কৰে ৷
ইফালে কলিকতাতো শ শ প্ৰতিবাদকাৰীয়ে নতুন আইন খনৰ বিৰোধিতা কৰে ৷ বিভিন্ন চৰকাৰ বিৰোধী শ্লোগান আৰু টায়াৰ জ্বলাই পৰিৱেশ উত্তপ্ত কৰি তোলে ৷
লগতে পঢ়ক: লুপ্তপ্ৰায় মেগনা কাৰ্টা আইন
