নেশ্যনেল ডেস্ক,26 ডিচেম্বৰ: নগা বিদ্ৰোহী সংগঠন এনএচচিএন(কে)ৰ এটি বিচ্ছিন্নতাবাদী শিবিৰৰ 50 গৰাকীকৈ সদস্য মূলসূঁতিলৈ উভটি আহিবলৈ সাজু ৷ ভাৰত-ম্যানমাৰ সীমান্তত দুয়ো দেশৰে সেনাৰ সঘনাই চলোৱা যুটীয়া অভিযানৰ বাবে বহু প্ৰত্যহ্বানৰ সন্মুখীন হৈ আহিছিল দলটো ৷ সুৰক্ষা সংস্থাই জনোৱা অনুসৰি বিগত কিছু মাহত ভাৰতীয় সেনা, সুৰক্ষা বাহিনী আৰু অনুসন্ধানকাৰী সংস্থাৰ যুটীয়া অভিযানৰ বাবে অৱশেষত আত্মসমৰ্পণৰ সিদ্ধান্ত গ্ৰহণ কৰে নিকি চুমীৰ নেতৃত্বাধীন NSCN(K)ৰ সদস্য সকলে ৷
ভাৰত আৰু ম্যানমাৰ সীমান্ত সেনাৰ মাজত সমন্বয় আৰু সহযোগিতা শেহতীয়াকৈ ভাৰতীয় চীফ অব আৰ্মী ষ্টাফ জেনেৰেল এম এম নাৰাৱানেৰ ভ্ৰমণৰ পিছতেই আৰু অধিক দৃঢ় হৈ পৰে ৷ চলিত বৰ্ষৰ অক্টোবৰত এম এম নাৰাৱানেই বৈদেশিক সচিব হৰ্ষবৰ্ধন শ্ৰীংলাৰৰ সৈতে ম্যানমাৰ ভ্ৰমণ কৰে ৷ এই ভ্ৰমণসূচীতে ভাৰতে ম্যানমাৰৰ নৌ-সেনালৈ চাবমেৰিন যোগান ধৰাৰ সিদ্ধান্ত গ্ৰহণ কৰে ৷
উল্লেখ্য যে, NSCN(K) আৰু কেইবাটাও নগা বিদ্ৰোহী সংগঠনে অসমৰ চুবুৰীয়া, মণিপুৰ আৰু অৰুণালচ প্ৰদেশৰ নগা অধ্যুষিত অঞ্চলসমূহ একত্ৰিত কৰি ‘বৃহত্তৰ নাগালেণ্ড’ গঠনৰ দাবী উত্থাপন কৰি আহিছিল ৷ সূত্ৰই প্ৰকাশ কৰা অনুসৰি বিচ্ছিন্নতাবাদী সংগঠনটোৰ নেতা ষ্টাৰচন লামকাঙৰ নেতৃত্বত প্ৰায় 52 জনকৈ সদস্যই নাগলেণ্ডৰ ফেক জিলাত সুৰক্ষা বাহিনীৰ আগত আত্মসমৰ্পণৰ বাবে প্ৰস্তুত ৷ আনহাতে, সংগঠনটোৱে জানিবলৈ দিয়া অনুসৰি 8 গৰাকী সদস্যই আত্মসমৰ্পণকাৰী দলটোত যোগদান কৰিব ৷
উল্লেখ্য যে, 2015 চনত মণিপুৰত ভাৰতীয় সেনাৰ কনভয়লৈ আক্ৰমণ চলোৱা NSCN(K)ৰ মুখ্য সদস্য আছিল নিকি চুমী ৷ এই আক্ৰমণতে ভাৰতীয় সেনাৰ 18 গৰাকীকৈ সদস্যই জীৱন হেৰুৱাব লগীয়া হৈছিল ৷
লগতে পঢ়ক-প্ৰতিদিনাই ৰাজধানীত 15 গৰাকী শিশু নিৰুদ্দেশ হয়: আৰক্ষী
