নিউজ ডেস্ক, 3 ছেপ্তেম্বৰঃ যোৰহাট জিলাৰ টীয়কত সংঘটিত ডাঃ দেৱেন দত্তৰ হত্যাকাণ্ডৰ বিৰুদ্ধে নতুন দিল্লীত প্ৰতিবাদ সাব্যস্ত কৰে চিকিৎসকে ৷ সৰ্বভাৰতীয় আয়ুৰ্বিদ্যা প্ৰতিষ্ঠান চমুকৈ এইমছৰ চিকিৎসকসকলে হাতত মমবাতি লৈ শান্তিপূৰ্ণ প্ৰতিবাদ সাব্যস্ত কৰে ৷
প্ৰতিবাদকাৰীসকলে দেশৰ চিকিৎসকসকলৰ নিৰাপত্তা নিশ্চিত কৰিবলৈ দাবী উত্থাপন কৰে ৷ স্বাস্থ্য মন্ত্ৰালয়ে চেন্ট্ৰেল প্ৰটেকশ্বন এক্টত শুধৰনি কৰি চিকিৎসকক নিৰাপত্তা প্ৰদান কৰিব লাগে বুলি উল্লেখ কৰে এইমছৰ বিশিষ্ট চিকিৎসক ডাঃ অমৰিন্দৰ সিঙে ৷ প্ৰতিবাদৰ অংশস্বৰূপে চিকিৎসকৰ দলটোৱে ডাঃ দেৱেন দত্তৰ প্ৰতিমূৰ্তিৰ আগত বন্তি প্ৰজ্জ্বলন কৰে ৷
উল্লেখ্য যে, টীয়কৰ এখন চাহ বাগিছাত সাধাৰণ কথাতে একাংশ উদণ্ড তথা বিকৃত মানসিকতাৰ লোকে মৰিয়াই মৰিয়াই হত্যা কৰিছিল অসমৰ এগৰাকী জ্যেষ্ঠ চিকিৎসক ডাঃ দেৱেন দত্তক ৷ ডাঃ দত্তৰ হত্যাকাণ্ডৰ গোচৰত যোৰহাট আৰক্ষীয়ে এতিয়ালৈকে 30গৰাকী লোকক আটক কৰিছে ৷ টীয়ক আৰক্ষী চকীত 434/2019 নং গোচৰত সৰ্বভাৰতীয় দণ্ডবিধি আইনৰ ধাৰা u/s 302, 341, 342, 427, 506, 143, 144, 147, 148, r/w 149, 186 আৰু অসম স্বাস্থ্য সেৱা কৰ্মী আৰু স্বাস্থ্য সেৱা অনুষ্ঠান (হিংসা আৰু সম্পত্তি ধ্বংস প্ৰতিৰোধ) আইন 2011ৰ ধাৰাৰ 4 অধীনত আটাইকেইগৰাকী লোকক গ্ৰেপ্তাৰ কৰিছে আৰক্ষীয়ে ৷
