নিউজ ডেস্ক, ২৩ এপ্ৰিলঃ কৰ'ণা ভাইৰাছৰ বাবে জাহাজত আৱদ্ধ হৈ থকা ১৪৬ গৰাকী ভাৰতীয় জাহাজ কৰ্মীক অৱশেষত বৃহস্পতিবাৰে মুম্বাইত নমোৱা হ'ব । থাইলেণ্ডৰ পৰা এমাহ পূৰ্বেই জাহাখনে যাত্ৰা আৰম্ভ কৰিছিল । মহাৰাষ্ট্ৰৰ মুখ্য়মন্ত্ৰী কাৰ্যালয়ৰ পৰা বুধবাৰে জনোৱা হৈছিল এই কথা ।
মাৰিলা ডিস্ক'ভাৰী নামৰ জাহাজখনে যোৱা ১৪ এপ্ৰিলতেই মুম্বাইত আহি পাবলৈ সক্ষম হৈছিল । কিন্তু কৰ'ণা ভাইৰাছৰ বাবেই অনুমতি দিয়া হোৱা নাছিল নামিবলৈ । বৰ্তমানলৈকে কোনো যাত্ৰীৰ দেহত কৰ'ণা ভাইৰাছৰ অৱস্থিতি ধৰা পৰা নাই বুলি মুখ্যমন্ত্ৰীৰ কাৰ্যালয়ৰ পৰা জানিবলৈ দিয়া হৈছে ।
জাহাজখনে কোচী, নিউ মেংগালুৰ, গোৱা ২ ৰ পৰা ৬ এপ্ৰিলৰ ভিতৰত যাত্ৰা কৰাৰ পাচত মুম্বাইত আহি উপস্থিত হৈছিল । যেতিয়া মহামাৰী আৰম্ভ হৈছিল সকলো যাত্ৰীকে থাইলেণ্ডৰ পৰা ১৪ মাৰ্চত যাবলৈ দিয়া হৈছিল । কিন্তু জাহাজখনৰ ষ্টাফ, কৰ্মীসকলক নমাৰ অনুমতি দিয়া হোৱা নাছিল কোচীত ।
কোম্পানীৰ পৰা কোৱা হয় যে, ৩৭ দিন থাইলেণ্ডৰ পৰা যাত্ৰা কৰাৰ পাচত কোনো লোক আক্ৰান্ত হোৱা নাই । তাৰ পাচতো হাৰবৰত প্ৰৱেশৰ অনুমতি দিয়া নহয় ।
পিচত মহাৰাষ্ট্ৰ চৰকাৰে কেন্দ্ৰৰ সৈতে এই বিষয়ে আলোচনা কৰাৰ পাচত মুম্বাইলৈ আহিবলৈ অনুমতি প্ৰদান কৰে জাহাজখনক । বৰ্তমান ১৪৬ গৰাকী লোকৰ স্বাস্থ্য পৰীক্ষা চলি থকাৰ লগতে আছুতীয়াকৈ ৰখাৰ ব্যৱস্থা কৰা হৈছে ।
