নেশ্যনেল ডেস্ক, ১৭ এপ্ৰিল: ক'ভিড-১৯ ৰ ভয়াৱহ সংক্ৰমণৰ মাজতে শনিবাৰে পশ্চিমবংগৰ ৪৫ টা সমষ্টিত অনুষ্ঠিত হৈছে পঞ্চম পৰ্যায়ৰ নিৰ্বাচন । নিৰ্বাচনৰ পূৰ্বৰ পৰ্যায়সমূহত ৰাজ্যখনত কেইবাটাও স্থানত সংঘটিত হিংসাত্মক ঘটনাত কেইবাগৰাকী লোকে প্ৰাণ হেৰুৱাইছে যাৰ বাবে পঞ্চম পৰ্যায়ৰ নিৰ্বাচত অধিক কটকটীয়া নিৰাপত্তা বেষ্টনী গঢ়ি তোলা হৈছে ৰাজ্যখনত । ইয়াৰ মাজতে দলে বলে পশ্চিমবংগত ভোট দিবলৈ ওলাই আহিছে ভোটাৰসকল । দুই এঠাইত ভোটাৰৰ ভিৰৰ বাবে কঠোৰ পদক্ষেপো ল'বলগীয়া হৈছে প্ৰশাসনে ।
নিৰ্বাচন আয়োগৰ সিদ্ধান্ত মৰ্মে মুক্ত আৰু নিৰপেক্ষ ভোটদানৰ বাবে ৰাজ্যখনত কেন্দ্ৰীয় বাহিনীৰ কমেও ৮৫৩ টা কোম্পানী মোতায়েন কৰা হৈছে । নিৰ্বাচন আয়োগৰ এগৰাকী শীৰ্ষ বিষয়াই জনোৱা মতে ভোটদানৰ সময়ত ক'ভিড প্ৰট'কল কঠোৰভাৱে পালনৰো নিৰ্দেশনা দিছে নিৰ্বাচন আয়োগে ।
ইয়াৰ মাজতে পশ্চিমবংগত বৃহস্পতিবাৰে দৈনিক আক্ৰান্তৰ সংখ্যা বৃদ্ধি হৈ ৬,৭৬৯ গৰাকী লোকৰ দেহত ধৰা পৰিছে ভাইৰাছৰ অৱস্থিতি আৰু একেদিনাই মহামাৰীত প্ৰায় ২২ গৰাকী লোকৰ মৃত্যু হৈছে ।
আনহাতে পঞ্চম পৰ্যায়ত কেইবাটাও গুৰুত্বপূৰ্ণ সমষ্টিত আছে প্ৰভাৱশালী নেতা । তাৰ ভিতৰত আছে শিলিগুৰিৰ মেয়ৰ আৰু বাওঁমৰ্চাৰ নেতা অশোক ভট্টাচাৰ্য, ৰাজ্যিক মন্ত্ৰী গৌতম দেৱ আৰু ব্ৰত্য বসু আৰু বিজেপিৰ সমিক ভট্টাচাৰ্য ।
উত্তৰ ২৪ পৰগণাৰ ৪৫ টা সমষ্টিৰ ১৫,৭৮৯ টা ভোটকেন্দ্ৰত, পুৰবা বৰ্ধমান আৰু নাদিয়াৰ আঠখন, জলপাইগুৰিত সাতখন, দাৰ্জিলিঙৰ পাঁচখন আৰু কালিম্পং জিলাৰ এখন আসনত ভোটগ্ৰহণ অনুষ্ঠিত হৈছে ।
এই পৰ্যায় শাসকীয় তৃণমূল কংগ্ৰেছৰ বাবে গুৰুত্বপূৰ্ণ কিয়নো ২০১৬ চনৰ ৩২ খন আসন লাভ কৰিছিল এই সমষ্টিসমূহত । এইবাৰ তাতকৈও বেছি আসনৰ চিন্তা কৰিছে টিএমচিয়ে । বিজেপিয়েও বেছি আসনৰ আশা এৰি দিয়া নাই । আনহাতে ২০১৬ ত বাওঁ-কংগ্ৰেছ মিত্ৰজোঁটে ১০ খন আসন লাভ কৰিছিল ।
ইয়াৰ মাজতে বাকী থকা আসনসমূহৰ নিৰ্বাচন একেলগে অনুষ্ঠিত কৰিবলৈ নিৰ্বাচন আয়োগক আহ্বান জনাইছে মুখ্যমন্ত্ৰী মমতা বেনাৰ্জীয়ে । ক'ভিড পৰিস্থিতিৰ বাবে এই আহ্বান জনাই মুখ্যমন্ত্ৰীগৰাকীয়ে ।
লগতে পঢ়ক: গুলমাৰ্গত প্ৰবল তুষাৰপাত
