নেশ্যনেল ডেস্ক,১২ জানুৱাৰী : ৰাম মন্দিৰ নিৰ্মাণ আৰু বিশাল অভিষেক অনুষ্ঠানৰ জৰিয়তে মন্দিৰ চহৰ অযোধ্যা এখন নতুন ব্যৱসায়িক কেন্দ্ৰ হিচাপে আত্মপ্ৰকাশ কৰিছে । অযোধ্যাত বাণিজ্যিক আৰু আৱাসিক দুয়োটা ক্ষেত্ৰতে ভূমিৰ মূল্যও বৃদ্ধি হৈছে ।
ফলস্বৰূপে, যোৱা ৫ বছৰত ভূমি পঞ্জীয়ন প্ৰায় দুগুণ হৈ ২৮,০০০ ৰ পৰা ৫০,০০০ হৈছে । লগতে, ষ্টাম্প আৰু পঞ্জীয়ন বিভাগে উপাৰ্জন কৰা ৰাজহ এই সময়ছোৱাত ৯২ কোটি টকাৰ পৰা ১৭৮ কোটি টকালৈ বৃদ্ধি হৈছে ।
ধৰ্মীয় নগৰী হিচাপে প্ৰতিষ্ঠিত অযোধ্যা এতিয়া ৰাম মন্দিৰৰ প্ৰাণ প্ৰতিষ্ঠাৰ লগে লগে আটাইতকৈ পছন্দৰ গন্তব্যস্থানসমূহৰ ভিতৰত অন্যতম হৈ পৰিছে । দেখা গৈছে যে আন ৰাজ্যৰ লোকসকলে অযোধ্যাত কেৱল ব্যৱসায় কৰিবলৈয়ে নহয় তাত বাস কৰিবলৈও আগ্ৰহী হৈছে ।
সম্পত্তি মুখ্যতঃ মূলত আশ্ৰম, হোটেল, অতিথিশালা, বিশ্ৰাম গৃহ আৰু মন্দিৰ স্থাপনৰ বাবে ক্ৰয় কৰা হৈছে । ইফালে ৰাম মন্দিৰ নিৰ্মাণৰ পিচতে ভক্তৰ নিৰন্তৰ প্ৰবাহ দেখা গৈছে । উত্তৰ প্ৰদেশৰ উপৰিও আন ৰাজ্যৰ পৰাও লাখ লাখ ভক্তৰ আগমন হোৱা দেখা গৈছে ।
ষ্টাম্প আৰু পঞ্জীয়ন বিভাগৰ স্বতন্ত্ৰ দায়িত্বত থকা ৰাজ্যিক মন্ত্ৰী ৰবীন্দ্ৰ জয়ছোৱালে কয় যে অযোধ্যাক ৰামনগৰী বুলিও জনা যায় আৰু এতিয়া ইয়াত ২২ জানুৱাৰীত এক বিশাল অভিষেক অনুষ্ঠানৰ আয়োজন কৰা হৈছে । এনে পৰিস্থিতিত মানুহে অযোধ্যাত মাটি ক্ৰয় কৰি ইয়াত ব্যৱসায় আৰম্ভ কৰিবলৈ আগ্ৰহী হৈছে । ফলস্বৰূপে অযোধ্যাত ভূমি পঞ্জীয়ন বৃদ্ধি হৈছে আৰু পৰৱৰ্তী সময়ত বিভাগটোৱে অধিক ৰাজহ উপাৰ্জন কৰিছে ।
২০১৮ চনত, ২৮,০০০ পঞ্জীয়ন হৈছিল আৰু চৰকাৰে ৯২ কোটি টকাৰ ৰাজহ উপাৰ্জন কৰিছিল । একেদৰে ২০২২-২৩ চনত, পঞ্জীয়ন আছিল ৩৭,০০০ আৰু ৰাজহ আছিল ১৬০ কোটি টকা । ২০২৩-২৪ বৰ্ষত ইতিমধ্যে ৪৬,০০০ পঞ্জীয়ন নথিভুক্ত কৰা হৈছে । চৰকাৰে ১৭৮ কোটি টকাৰ ৰাজহ উপাৰ্জন কৰিছে ।
লগতে পঢ়ক :ৰাম মন্দিৰৰ সিদ্ধান্তত পলম হোৱাটো বিচাৰিছিল মোদীয়ে; প্ৰধানমন্ত্ৰীক আক্ৰমণ সুব্ৰমণিয়ম স্বামীৰ
