নেশ্যনেল ডেস্ক,২১ এপ্ৰিল : নতুন দিল্লীৰ সাকেট আদালতত ভয়ংকৰ ঘটনা । আদালত চৌহদত দুৰ্বৃত্তৰ গুলীচালনা । অধিবক্তাৰ পোছাকত অহা দুৰ্বৃত্তই এগৰাকী মহিলাক লক্ষ্য কৰি গুলীচালনা কৰে । গুৰুতৰভাৱে আহত মহিলাগৰাকী । আৰক্ষীয়ে ঘটনা সন্দৰ্ভত তদন্ত আৰম্ভ কৰিছে (Delhi Saket court firing)।
শুকুৰবাৰে পুৱাই দিল্লীৰ সাকেট আদালতত হুলস্থূলীয়া পৰিৱেশ । আদালত চৌহদত এগৰাকী মহিলাক লক্ষ্য কৰি দুৰ্বৃত্তই গুলীচালনা কৰে । জানিব পৰা মতে দুৰ্বৃত্তজন অধিবক্তাৰ পোছাকত আহিছিল । প্ৰত্যক্ষদৰ্শীৰ মতে অভিযুক্তজনে মহিলাগৰাকীক লক্ষ্য কৰি ৪ বাৰকৈ গুলীয়াইছিল (Woman shot by miscreants dressed as lawyer)।
আহত মহিলাগৰাকীক লগে লগে চিকিৎসালয়ত ভৰ্তি কৰোৱা হয় । বৰ্তমান তেওঁৰ অৱস্থা সংকটজনক বুলি জানিব পৰা গৈছে । দুয়োগৰাকীৰে মাজত পূৰ্বৰে পৰা বিবাদ আছিল বুলি জানিব পৰা গৈছে । অৱশ্যে অভিযুক্তজনক এতিয়ালৈকে গ্ৰেপ্তাৰ কৰা হোৱা নাই । আৰক্ষীয়ে ঘটনাটোৰ তদন্ত আৰম্ভ কৰিছে ।
লয়াৰ্ছ ব্লকৰ ওচৰত সংঘটিত এই ঘটনাই সমগ্ৰ আদালতত এক আলোড়নৰ সৃষ্টি কৰিছে । ঘটনাটোৰ সময়ত অধিবক্তাসকলো আদালতত উপস্থিত আছিল । একে সময়তে, একাংশ অধিবক্তা ঘটনাস্থলীৰ সমীপতে আছিল । ইফালে অভিযুক্তই কেনেকৈ অস্ত্ৰ লৈ আদালত চৌহদত প্ৰৱেশ কৰিব পাৰিলে তাক লৈ বিভিন্ন মহলত প্ৰতিক্ৰিয়া সৃষ্টি হৈছে ।
প্ৰৱেশ দ্বাৰত থকা স্কেনাৰেৰে সকলোকে পৰীক্ষা কৰা হোৱা নাছিল নেকি বুলিও প্ৰশ্ন উঠিছে । অভিযুক্তই অধিবক্তা হোৱাৰ সুযোগ লৈছিল নেকি আৰু নিৰাপত্তা পৰীক্ষা কৰা নাছিল নেকি বুলিও বিভিন্ন মহলত চৰ্চা চলিছে । আৰক্ষীয়ে সমগ্ৰ দিশবোৰ পৰীক্ষা কৰি আছে ।
উল্লেখ্য যে যোৱা বছৰৰ ২৪ ছেপ্টেম্বৰতো দিল্লীৰ ৰোহিনী আদালতৰ ভিতৰত এই ধৰণৰ ঘটনা সংঘটিত হৈছিল (Rohini court firing case)। অধিবক্তাৰ পোছাকত অহা দুই বন্দুকধাৰীয়ে গুলী চালনা কৰিছিল । অৱশ্যে আৰক্ষীৰ গুলীত বন্দুকধাৰী নিহত হৈছিল । আক্ৰমণকাৰী ৰাহুল ত্যাগী আৰু জগদীপ জগ্গাই অধিবক্তাৰ পোছাক পৰিধান কৰি আদালতত প্ৰৱেশ কৰিছিল । তাৰ পাচতে গেংষ্টাৰ জীতেন্দ্ৰ মান ওৰফে গোগীৰ ওপৰত একাধিক গুলীচালনা কৰিছিল ।
লগতে পঢ়ক :Atiq Ashraf killing : আতিকৰ হত্যাকাৰীক সহায় কৰা ৩ জনক আটক
